Ձե՞ռ եք առնում տղերք, մսխում եք մարդկանց հույսը, հայրենիքի փրկության համար պայքարի տենչն ու Հայաստանի ապագան

«Ազգ-բանակ-հաղթանակ» բացականչությունն օդի մեջ մնաց․․․

44 օր իշխանությունը՝ երկրի ղեկավարների գլխավորությամբ հասարակությանը կերակրեց ստերով ու հաղթանակի սին խոստումներով․․․ 44 օր համոզեց, հավատացրեց, հույս տվեց և․․․ խաբեց․․․ Արցախի մեծ մասն ու Հայաստանից հատվածներ թուրքի ձեռքին են, էլ չենք խոսում գերիներից, հազարավոր զոհերից ու անեհտ կորածներից․․․

Իշխանությունը, կարելի է ասել ծախեց իր հայրենիքն ու իր ժողովրդին (թեև այս պարագայում վիճելի է, թե ում է համարում այդ իշխանությունը իր ժողովուրդ և որն է իր հայրենիքը․․․)։

Դրանից հետո եկան մարդիկ, որոնք իրենց անվանեցին ընդդիմություն․․․

Նրանք տեսան, որ ժողովուրդը խաբված է, խփված է, վիրավոր է․․․ ու որոշեցին ևս մեկ ստուգիչ հարված հասցնել․․․

Բոլորին կանչեցին, հավաքեցին, խոստացան տապալել դավաճանին, գահընկեց անել իշխանությանն ու իրենց գործողություններով ավելի ամրապնդեցին իշխանության ու մասանվորապես վարչապետ Նիկոլ Փաշինյանի դիրքերը։

4 ամիս փողոցներում մարդկանց տարան այն կողմ, բերեցին այս կողմ, քայլեցին, ակցիաներ արեցին, Բաղրամյան պողոտան սարքեցին բացօթյա հյուրանոց և մնացին իրենց կոչերի տակ․․․

Հայաստանը մի ղեկավար ուներ, ով սիրում էր ասել, թե կրկեսի վերածելու հայրենիք չունենք․․․ հիմա պարզվում է՝ ունենք։ Ավելին՝ շուտով այդ կրկեսի վրածված հայրենիքն էլ չենք ունենալու, եթե շարունակենք այսպես՝

Նախագահը մի կողմից պահանջի վարչապետի հրաժարականն ու մյուս կողմից նպաստի նրա ընդունած որոշումների իրականացմանը
ԳՇ կազմը մի կողմից պահանջի վարչապետի հեռացումն ու մյուս կողմից զգաստ ոտքի կանգնի նրա առաջ, երբ այդ նույն դավաճան որակված վարչապետը մտնի գենշտաբ
Եվ ի վերջո, ընդդիմությունը մի կողմից կոչերով պահանջի վարչապետի հրաժարականն ու մյուս կողմից օգնի վարչապետին, որ հավաքվածները չխանգարեն նրան որոշումներ կայացնել, տեղաշարժվել ու վերջանականապես փուռը տալ հայրենիքը․․․

Երբեմն այնպիսի տպավորություն է, որ «Հայրենիքի փրկության շարժման» ղեկավարները մոռացել են, որ իրենք ոչ թե թամադաներ են, ովքեր բարձրախոսներն իրար ձեռքից խլելով՝ շախի են գցում հավաքվածներին, այլ երկրի ղեկավարի հրաժարականի շարժումը համակարգողներ․․․

Ի՞նչ է նշանակում փակել Ազգային ժողովի մուտքերը (ընդ որում, երբ վարչապետը չի գնալու Աժ և քառօրյա նիստ չկա) և ասել, թե «Աժ-ն ունի նաև տնտեսական մուտք՝ կարտոֆիլ, սոխ, այլ մթերքներ և իրեր տեղափոխելու համար, մի քանի պատգամավոր ԱԺ են մտել այդ մուտքից»․․․ ձե՞ռ եք առնում, հարգելի ընդդիմություն։

Փակող էիք՝ ԱԺ և կառավարության հարց ու պատասխանի օրը փակեիք, երբ գործադիրն ԱԺ շենքում էր․ կլիներ՝ երկուսը մեկում․․․ իսկ այսպես ստացվում է, որ ընդդիմությունը կամա, թե ակամա մասնակցում է կրկեսին․․․

Կամ ի՞նչ էր նշանակում ԳՇ պետի ազատման հետ կապված այս ներկայացումը․ դիմումը տարան, հետ բերեցին, հանդիպեցին, քննարկեցին, պահանջեցին ու․․․

Մի խոսքով՝ Նիկոլի նման թափթփուկ ու նեղմիտ գործչի ղեկավարած նույնքան փնթի իշխանությունն արժանի է հենց այս ընդդիմությանը, որն իր քայլերով երկարաձգում է սրանց իշխանությունը․․․ այստեղ խնդիրն այն է միայն, որ օրեցօր ավելի է թուլանում երկրի անվտանգությունն ու նպաստում երկիրը տանուլ տալու գործընթացին։

Իսկ եթե այդպես է, եթե ժողովրդին փողոց են հանում Նիկոլի հրաժարականը պահանջելու՝ առանց կոնկրետ գործողությունների, ու այդ ընթացքում թշնամին դիրք առ դիրք առաջ է գալիս, ապա Նիկո՛լն այդ ամենն ի՞նչ վատ է անում որ․․․ էհ «թողեք, թող աշխատի»․․․

Իսկ եթե ավելի լավ բան եք ուզում անել՝ արեք, ո՞ւմ եք սպասում․․․

Հայրենիքը կորցնելու մտավախությամբ ու այն պաշտապնելու պատրաստակամությամբ ժողովուրդը վաղուց է արդեն պատրաստ կոնկրետ գործողությունների․․․ կամ դուք օգտագործելու եք այդ ուժը և մենք ունենանք «այլևս ոչ մի թիզ թշնամուն» կարգախոսով հայրենիք, կամ հերթական անգամ հուսախաբ եք անելու ժողովրդին՝ մսխելով ժողովրդի վերջին հույսն ու Հայաստանի ապագան․․․

Արմինե Մկրտումյան