Մարտի 16-ին գերիներ կվերադառնան. նման հավաստիացում է տրվել անհետ կորած զինծառայողների հարազատներին. «Փաստինֆո»

Անհետ կորած զինծառայողների հարազատների տեղեկություններով՝ հնարավոր է գերիների նոր խումբ այսօր հայրենիք վերադառնա։ Համենայն դեպս՝ միջնորդավորված նրանց այդպիսի հավաստիացումներ են փոխանցվել իշխանական տարբեր խողովակներից, որի արդյունքում ծնողները որոշել են հետաձգել իրենց բողոքի ակցիաները։

«Փաստինֆո»-ի տեղեկություններով՝ երեկ՝ մարտի 15-ին, անհետ կորած ծնողներին հարազատները պատրաստվում էին փակել Երևան-Հոկտեմբերյան միջպետական ճանապարհը՝ ի նշան բողոքի, հետո տեղեկացել են, որ հնարավոր է գերիների նոր խումբ վերադառնա հայրենիք։

«Խոսակցություններ կան, ասում էին ամսի 15-16-ին կգան»,- «Փաստինֆո»-ին հայտնեց զինծառայողի հարազատներից մեկը՝ նշելով, որ ակցիան հետաձգել են՝ չխանգարելու ռազմագերիների վերադարձին։

Մեր զրուցակիցը նշեց, որ եթե տղաները չվերադառնան, ապա մի քանի օրից կրկին անհնազանդության ակցիաներ են պատրաստվում անել։

«Եթե այսօր կամ վաղը գերիներով փոխանակվեցին, գերիները գան, շատ բան կփոխվի, եթե չէ՝ անհնազանդություն ենք անելու, որ իշխանությունը հասկանա՝ անհետ կորած զինծառայողների ծնողների հետ խաղ անել չի կարելի»,- ասաց զինծառայողի մայրը։