«Ասաց` պատերազմ կլինի, ինձ դագաղով կբերեն». Դավիթ Յակովլևը մեր դաշտերն ու անտառներն աչքերի մեջ տարավ իր հետ (տեսանյութ)
Դավիթ Արմանի Յակովլև (2001-2020)
«Դավիթը մեր առաջին թոռնիկն էր, սիրում էի իր հետ ինչ-որ տեղ գնալ»։ Պատմում է Արցախյան երկրորդ գոյամարտում զոհված զինվոր Դավիթ Արմանի Յակովլևի պապը՝ Հայկ Հայթայանը։ Նա հիշում է, երբ մի անգամ բնության գրկում էին, Դավիթին հարց է ուղղել․ «Տեսնո՞ւմ ես Դավիթ, ինչ գեղեցիկ լեռներ, դաշտեր ու անտառներ ունենք։ Ասաց՝ պապի, ես աչքերիս մեջ տպել եմ մեր դաշտերն ու անտառները․․․ հետո նա սկսեց նկարել դրան։ Այդպես էր ինքնարտահայտվում»,- հիշում է Հայկ Հայթայանը։
Նկարել է գեղեցիկ բնակարաններ. դա իր զբաղմունքն էր: Բայց նկարելուց բացի ցանկանում էր դառնալ IT ոլորտի մասնագետ և շատ լավ էր սովորում։ Ուսուցիչները պատմում են, որ եթե նա չզոհվեր` ապա ոլորտի լավագույն մասնագետներից մեկն էր լինելու։
Այս ուղղությամբ Դավիթն արդեն աշխատում էր։ Յութուբյան հաշիվ էր բացել հոր անունով ու իր ստեղծած ծրագրերն էր զետեղում այնտեղ։
Մայրը՝ Սոֆի Հայթայանը պատմում է, որ յութուբից ստացած առաջին աշխատավարձը ցանկացել է մոր համար նվեր անել և ժամացույց է գնել․ «Մնայուն նվեր»,-ասում է մայրը։
Դավիթը մահվան մասին տանը երբևէ չի խոսել, բայց դպրոցում ընդհանուր զրույցի ժամանակ կարծես կանխատեսել է իր մահը։
Ռուսերենի ուսուցչուհի Վարդուհի Ղուկասյանն է պատմում. «Ասաց` Վարդուհի Ալբերտովնա, պատերազմ կլինի, ինձ դագաղով կբերեն... ես նրան թույլ չտվեցի շարունակել, ընդհատեցի»։
Պատերազմի ժամանակ նա իր կամքով է գնացել թեժ կետեր։ Մարտի ժամանակ այդ պահին 15 հոգով են կռվելիս եղել․ 4-ը վիրավորվել են, 11-ը՝ մահացել, այդ թվում նաև Դավիթը։
«Ասում են, եթե Աստված մեկին շատ է սիրում և օրհնում՝ սատանան նրան անմիջապես նկատում է»,-նկատում է Հայկ Հայթայանը։
Կենսագրություն
Դավիթ Արմանի Յակովլևը ծնվել է 2001թ. ք. Երևանում:
2019թ. ավարտել է Արտաշես Շահինյանի անվան ֆիզմաթ դպրոցը:
Հայ-ամերիկյան համալսարանում ամենաբարձր միավորով մաթեմատիկայի քննություն հանձնելուց հետո որոշել է, որ IT մասնագետ դառնալու համար ավելի ճիշտ է սովորել ԵՊՀ-ում։
Ընդունվել է Երևանի պետական համալսարանի ինֆորմատիկայի և կիրառական մաթեմատիկայի ֆակուլտետ՝ մագիստրատուրան աշխարհի լավագույն համալսարաններից մեկում անցնելու նպատակով։
2019թ. հուլիսի 19-ին զորակոչվել է բանակ:
Դասակի հրամանատարի տեղակալ Դավիթ Յակովլևի վերջին, վեցօրյա թեժ մարտը Մարտունիի կետերից մեկում էր։ Մաթեմատիկական փայլուն գիտելիքների շնորհիվ Բարդի 1 օպերացիայի ընթացքում ճշգրիտ հաշվարկներով, ոչ միայն արագ ու անվրեպ ոչնչացրել է թիրախները, այլև օգնել մարտկոցի մյուս երեք САУ-ների հաշվարկները կատարելուն։
Արժանացել է Մարտական ծառայության և արիության համար մեդալի։
Տեսանյութ․
