Վարկային միջոցներով 8 անասնաբուժական կենտրոն կկառուցվի

«Գյուղատնտեսական ծրագրերի իրականացման գրասենյակի» կողմից իրականացվում է 8 անասնաբուժական սպասարկման կենտրոնի կառուցում Արագածոտնի, Շիրակի, Տավուշի, Լոռու, Գեղարքունիքի, Սյունիքի, Վայոց Ձորի, Կոտայքի մարզերում: Այս մասին newspres.am-ին տեղեկացրեցին ՀՀ գյուղատնտեսության նախարարության լրատվական ծառայությունից:

Նշենք, որ 8 կենտրոնների կառուցման համար ծրագրերի միջոցներից տրամադրված է շուրջ 850 հազ ԱՄՆ դոլար վարկային միջոց, յուրաքանչյուր կենտրոն ունենալու է 1-2 աշխատակից:

Կենտրոնի համար գույքի և սարքավորումների ձեռքբերումն իրականացվում է ծրագրի միջոցներով: Կենտրոնների մատուցվող ծառայություններից գոյացած հասույթից իրականացվելու է աշխատակիցների վարձատրությունը, կենտրոնի կենցաղային վարձերի և հարկերի վճարումը:
Ծրագրի կողմից կառուցված կենտրոնները պատկանում են Հայաստանի Հանրապետությանը և տրվելու են նրան անհատույց, անժամկետ կառավարման: Կենտրոններում անցկացվում են աշխատաժողովներ և վերապատրաստման ծրագրեր, որոնք վարում են տեղի և օտարերկրյա մասնագետները։ Յուրաքանչյուր մարզում կառուցված կենտրոնը, 10 և ավել անասնաբույժների հետ համագործակցելով, սպասարկելու է ամբողջ մարզի ֆերմերային տնտեսություններին: Կենտրոնների կողմից մատուցվում են վճարովի ծառայություններ՝ արհեստական սերմնավորում, դեղորայքի և գործիքների վաճառք, անասնաբուժական այլ ծառայություններ և այլն:

Կենտրոններ կառուցվելու են ՀՀ Արագածոտնի մարզի Արտաշավան համայնքում (գործում է), ՀՀ Սյունիքի մարզի Խնձորեսկ համայնքում (գործում է), ՀՀ Գեղարքունիքի մարզի Ճամբարակ համայնքում (գործում է), ՀՀ Տավուշի մարզի Բերդ համայնքում, ՀՀ Շիրակի մարզի Փանիկ համայնքում, ՀՀ Լոռու մարզի Մեծ Պարնի համայնքում:

Կոտայքի մարզի և Վայոց Ձորի մարզի կենտրոնների տեղը դեռ որոշված չէ: