Կայացել է Սոնա Մանուկյանի «Երբ լռում է մարդկությունը․․․» գրքի շնորհանդես-քննարկումը

Մարտի 25-ին Սիլվա Կապուտիկյանի տուն-թանգարանում կայացավ Սոնա Մանուկյանի «Երբ լռում է մարդկությունը․․․» գրքի շնորհանդես-քննարկումը, որին ներկա էին մտավորականներ, թանգարանի աշխատակիցները, հեղինակի ընթերցողներն ու նրա գրչի սիրահարները։

Գրքում ամփոփված են հեղինակի երկու ստեղծագործությունները, որոնք առանձնանում են պատումի յուրահատկությամբ և հեղինակի ոճային առանձնահատկությամբ։ Գրքում խոսվում է 20-րդ դարում հայ ժողովրդի կյանքում կատարված ճակատագրական իրադարձությունների մասին, որոնք իրենց հետքը թողեցին մեր պատմության հաստափոր հատորներում։ Գրքում նկարագրվում է թուրք-ադրբեջանական կողմի վարած ցեղասպան քաղաքականության և աշխարհի գերտերությունների կողմից այդ վայրագությունների անտարբերության մասին։

Հատկանշական է, որ գրքում անդրադարձ կա նաև 2004 թվականին Ռամիլ Սաֆարովի կողմից Բուդապեշտում սպանված հայ սպա Գուրգեն Մարգարյանի ողբերգական դեպքին, ինչպես նաև Հրանտ Դինքի սպանությանը։ Գրքում տեղ գտած երկրորդ վիպակում խոսվում է Խորհրդային տարիներին Հայոց եկեղեցու դեմ կատարված ոճրագործությունների, ինչպես նաև այդ շրջանում Ամենայն հայոց կաթողիկոսի ողբերգական մահվան մասին։ Պետք է ընդգծել, որ հեղինակը կարողանում է պատմական իրադարձություններին միահյուսել գեղարվեստականությունը և դա հետաքրքիր ոճով ներկայացնել ընթերցողին։ Ներկաներն իրենց խոսքում ընդգծեցին գրքի կարևորությունը, հատկապես հեղինակի նրբանկատ և մանրակրկիտ աշխատանքը պատմական փաստաթղթերի, պայմանագրերի, արխիվային նյութերի հետ։ Առաջիկայում գիրքը կթարգմանվի այլ լեզուներով ևս։ Գրքի հեղինակ Սոնա Մանուկյանն իր խոսքում ընդգծեց, որ ցանկանում է, որպեսզի գիրքը թարգմանվի նաև թուրքերեն լեզվով։ Պետք է ընդգծել, որ վերջին տարիներին թուրքերենով և անգլերենով լույս են տեսնում թուրքերի կողմից հայերի դեմ իրականացված ոճրագորխությունների մասին պատմական գրքեր։

Գիրքն ի սկզբանե գրվել է որպես կինոսցենար՝ կինոնկար նկարահանելու համար։ Այդկերպ հեղինակը ցանկացել է գրքում արծարծված թեմաների շուրջ ավելի մեծ ուշադրություն հրավիրել։ Հավելենք նաև, որ վեպ-կինոսցենարը մեծ հավանության է արժանացել մի շարք մտավորականների, գիտնականների, ինչպես նաև մի շարք կինոստուդիաների կողմից։ Վերոնշյալ մարդիկ և կառույցները բարձր են գնահատել հեղինակի կատարած աշխատանքը։

Հավելենք, որ գրքի շնորհանդես-քննարկում եղել է նաև Գիտությունների ազգային ակադեմիայում, ինչպես նաև Ցեղասպանության թանգարան ինստիտուտում։