«Դավիթս, հզորս, հերոս...ամեն ինչ արեցիր, որ քո կատարած յուրաքանչյուր գործ անթերի լինի». Անահիտ Հայթայան

Արցախյան երկրորդ գոյամարտում զոհված զինվոր Դավիթ Արմանի Յակովլևի տատը` Անահիտ Հայթայանը ֆեյսբուքյան իր էջում տեղադրել է լուսանկարներ և կից գրել.

«Մեր թանկագին, անգերազանցելի Դավիթ...

Մեր ամեն օրը սկսվում ու ավարտվում է քեզ հետ։ Դու ամեն վայրկյան մեզ հետ ես, բայց կարոտը խեղտում է։ Որովհետև ԴՈւ իսկապես ուրիշ էիր։

Ավելին, քան քո շատ սիրելի մայրիկն է ասել այս առթիվ, ավելացնելու բան չկա.

«Դավիթս, հզորս, հերոսս...

Դու միշտ եղել ես մեր ընտանիքի հպարտությունը։ Հպարտացել ենք թե՛ քո մարդ տեսակով, թե՛ մտավոր կարողություններով։

Երեւի թե հպարտության պատճառներից մեկն էլ այն էր, որ քեզ վստահված ցանկացած գործ պիտի անթերի կատարեիր եւ երբեք չհամակերպվեիր պարտության հետ։

Դու ամեն ինչ արեցիր, որ քո կատարած յուրաքանչյուր գործ անթերի լինի եւ անցած ճանապարհդ միշտ հաղթանակներով պսակվի։

Այդպիսին մնացիր նաեւ հայրենիքի պաշտպանության ժամանակ, ինչի վառ ապացույցն է քո Մարտական ծառայության ու Արիության պարգեւը»»:

Կենսագրություն

Դավիթ Արմանի Յակովլևը ծնվել է 2001թ. ք. Երևանում:

2019թ. ավարտել է Արտաշես Շահինյանի անվան ֆիզմաթ դպրոցը:
Հայ-ամերիկյան համալսարանում ամենաբարձր միավորով մաթեմատիկայի քննություն հանձնելուց հետո որոշել է, որ IT մասնագետ դառնալու համար ավելի ճիշտ է սովորել ԵՊՀ-ում։

Ընդունվել է Երևանի պետական համալսարանի ինֆորմատիկայի և կիրառական մաթեմատիկայի ֆակուլտետ՝ մագիստրատուրան աշխարհի լավագույն համալսարաններից մեկում անցնելու նպատակով։

2019թ. հուլիսի 19-ին զորակոչվել է բանակ:

Դասակի հրամանատարի տեղակալ Դավիթ Յակովլևի վերջին, վեցօրյա թեժ մարտը Մարտունիի կետերից մեկում էր։ Մաթեմատիկական փայլուն գիտելիքների շնորհիվ Բարդի 1 օպերացիայի ընթացքում ճշգրիտ հաշվարկներով, ոչ միայն արագ ու անվրեպ ոչնչացրել է թիրախները, այլև օգնել մարտկոցի մյուս երեք САУ-ների հաշվարկները կատարելուն։

Արժանացել է Մարտական ծառայության և արիության համար մեդալի։