Հայաստանում սահմանադրական կարգ գոյություն չունի, կա ցեղապետության նման մի երևույթ. քաղաքագետ

Իմ կարծիքով, իմ շփումներով մարդկանց հետ, իմ հարաբերություններով՝ կարող եմ ասել, որ Հայաստանում իրոք որոշիչ քանակի ապուշներ գոյություն չունեն, որպեսզի Նիկոլ Փաշինյանի կեղծիքներին և անբարոյականությանը հավատան: Այդ մասին այսօր մամուլի ասուլիսում ասաց «Քառյակ մեդիայի» համահիմնադիր Միհրան Հակոբյանը: 

Ըստ նրա՝ երկու տարուց ավելի է, ինչ Հայաստանում սահմանադրական կարգ, որպես այդպիսին, գոյություն չունի, կա ցեղապետության նման մի երևույթ, որի ղեկավարը փորձում է իր խնդիրներն առաջ տանել զոռբայությամբ և ամենատարատեսակ բռնի և անբարոյական մեթոդաբանությամբ: 

«Այն, որ «Քոչարյանի գործ» կա, «Մարտի 1-ի գործ» չկա, դրա մասին խոսվում է երկու տարուց ավելի: Երկրորդ նախագահին Հայաստանի ներկայիս իշխանություները փորձել ու փորձում են դատապարտել: Բայց անգամ Սահմանադրական դատարանի միաձայն որոշումը դրա ամենավառ ապացույցն է, որ «Մարտի 1-ի գործ» գոյություն չունի»,- ասաց Հակոբյանը: 

Վերջինս ընդգծեց, որ Նիկոլ Փաշինյանը շուրջ 3 տարի է արդեն երկիրը ձախողել է, հասցրել է աղետի բերան, երկիրը կապիտուլացրել է, Արցախը հանձնել է, 5000-ից ավել տղաների գլուխ է կերել, դրա հետ մեկտեղ նա երկիրը չի կառավարել:

«Նիկոլ Փաշինյանը փորձել է իր բոլոր ձախողումները, իր չաշխատելը բացատրել, որ ինքը գործել է նախկին ռեժիմների երևութական հողմաղացների դեմ պայքարի ոգով: Ես չգիտեմ՝ Հայաստանում այդ քանակի ապուշներ կա՞ն, թե՞ չկան, որ աշխատի, բայց իմ կարծիքով, իմ շփումներով, իմ հարաբերություններով մարդկանց հետ կարող եմ ասել, որ Հայաստանում իրոք որոշիչ քանակի ապուշներ գոյություն չունեն, որպեսզի Նիկոլ Փաշինյանի կեղծիքներին և անբարոյականությանը հավատան»,- ասաց բանախոսը: 

Ինչ վերաբերում է դատախազների՝ դատական նիստին չներկայանալուն, Հակոբյանը պատասխանեց, որ Սահմանադրական դատարանի որոշումը հստակ ազդակ էր, որ այդ հոդվածը գոյություն չունի: 

«Դատախազները, կարծում եմ, հասկացան, որ այլևս անիմաստ է, որ իրենք ներքաշված լինեն այս  խնդրի մեջ: Տեղից էլ Գլխավոր դատախազը՝ իր տեղակալներով և Քոչարյանի գործով ներգրաված դատախազները կարմիր գծերը շատ վաղուց անցել»,- եզրափակեց նա: