Մինչև հիմա սպասում եմ, որ կզանգի․ հերոս Հրանտ Չիլինգարյանի ծնունդը Եռաբլուրում են շնորհավորել (լուսանկար)

Արցախյան 2-րդ պատերազմում զոհված ժանկետային զինծառայող Հրանտ Չիլինգարյանը երազում էր խոհարար դառնալ, սովորել է խոհարարական քոլեջում։ Մանուկ հասակից հետաքրքրել էր այդ մասնագիտությունը նրան, բայց չհասցրեց։

Ծնվել է 2001 թվականին, Երևանում։ 

Ճանաչողները գիտեն՝ երբեք չի ստել, ազնիվ ու բաց սիտ ուներ։

Հրանտը զորակոչվել է բանակ 2019թ-ի հուլիսի 9-ին։ Վեց ամիս Գյումրիում ծառայելուց հետո եկել է արձակուրդ ու տեղափոխվել է Արցախ, Թալիշ։ 

Արդեն մեկ տարվա ծառայող է եղել, երբ սկսվել է պատերազմը։

Պատերազմի սկսվելուց հետո 6 օր անց Հրանտը զանգահարել է տուն, խոսել մոր հետ։

«Մամ ջան լավ եմ, իմ համար չանհանգստանաք»,-ասել է նա, ու որպեսզի մայրը չանհանգստանա՝ ամեն օր մի քանի անգամ զանգահարել ու սիրտ է տվել տնեցիներին, թե՝ հաղթելու ենք․․․

Վերջին անգամ զանգահարել է հոկտեմբերի 13-ին և տեղեկացրել, որ դիրքերում են՝ հնարավոր է էլ չզանգի։

«Էլ չզանգեց, բայց մինչև հիմա սպասում եմ, որ կզանգի ու կասի՝ բարև «գանձս», էտպես էր ինձ դիմում»,-ասում է մայրը։

Հրանտի հետ կռված կամավորներից մեկը հայտնել է, որ տղան մահացել է ԱԹՍ-ի հարվածից։

Նրա հեը զրույցները մայրն այսօրվա նման է հիշում․ «Ասում էր՝ մամ ջան կգամ կաշխատեմ, կունենանք լավ տուն, ամեն բան լավ կլինի, հետո կամուսնանամ ու իմ երեխաները կունենամ, բալիս երազանքները մնաց օդում, չհասավ ոչ մի բանի»։

Հրանտի 20-ամյակը հարազատները նշել են Եռաբլուրում։

Նրա շիրիմին տարել էին ծաղիկներ ու խմորեղեն։

Մայրը չի հաշտվում վշտի հետ, դիակը չի տեսել, դատարկ արկղ են դրել իր դիմաց․

«Բա մայրը19 տարի պահի իր բալին ու չկարողանա դրանից հետո իր բալի ճակատը պաչի՞․․․»,-արցունքների միջից ասում է նա։