Բուհերի ընդունելության կարգը փոխվում է. նախարարը մանրամասներ է ներկայացնում

Այսօր՝ ապրիլի 1-ին կայացած ՀՀ կառավարության նիստի ժամանակ Կրթության գիտության, մշակույթի, սպորտի նախարար Վահրամ Դումանյանը հայտարարեց, որ բուհերի ընդունելության կարգում առկա են փոփոխություններ։ 

Նախարարի խոսքով՝ ընդունելությունը կկատարվի երկու փուլով. Առաջին փուլում դիմորդները կընտրեն բուհը և կընտրեն կոնկրետ մասնագիտությունը, կլրացնեն հայտը: Բոլոր դիմումները լինելու են էլեկտրոնային տարբերակով: Կանցկացվի մրցույթ, որից հետո կհայտարարվեն արդյունքները, ինչպես նաև կհայտարարվեն թափուր մնացած տեղերի քանակը՝ ըստ բուհերի և մասնագիտության։

Երկրորդ փուլում այն դիմորդները, որոնք չեն ընդունվել առաջին փուլով, կարող են դիմել 6 տարբեր մասնագիտությամբ, որոնք պահանջում են այն քննությունների փաթեթը, որոնք իրենց արդեն հանձնել են: Երկրորդ փուլով կանցկացվի մրցույթը ավել բարձր բալ ստացած ուսանողների միջև:

«Ի տարբերություն նախորդ տարվա, երբ որոշվեց ընդունելության միայն մեկ քննություն անցկացնել, այս տարի կանցկացվի 2-ից ոչ ավել քննություն»,-հայտարարեց նախարարը։