Թուրքիան եղել է և կմնա հայոց պետականության ամենամեծ վտանգներից մեկը. Արցախի ԱԳՆ

Քաղաքականությունը՝ քաղաքականություն, արտաքին քաղաքականությունը՝ առավել ևս, բայց կոմունիկացիաների ապաշրջափակումն, ըստ իս, զուտ պետք է լինի տնտեսական հարթությունում. Թուրքիան եղել է և կմնա հայոց պետականության ամենամեծ վտանգներից մեկը: Այդ մասին «Եռաբլուր» զինվորական պանթեոնում լրագրողների հետ զրույցում ասաց Արցախի արտգործնախարար Դավիթ Բաբայանը: 

«Դրա մասին իրենք են հայտարարել, սա իմ ասածը չէ, սա պաշտոնական Անկարայի, պաշտոնական Բաքվի հայտարարություններն են և ոչ միայն հայտարարությունները, գործողությունները, որովհետև 44-օրյա պատերազմի ժամանակ Թուրքիան իր դեմքը ցույց տվեց: Շատերը գուցե մոռացել էին իր դեմքը, բայց նա նորից ցույց տվեց: Հետևաբար, մենք պետք է շատ խելացի քաղաքականություն վարենք, իրատեսական և  երբևիցե չմոռանանք՝ ում հետ գործ ունենք: Լավ է, որ տարբեր երկրների հետ ուզում ենք հարաբերությունները լավացնել, բայց այլ հարց է՝ այդ երկրներն ուզո՞ւմ են մեզ հետ հարաբերությունները լավացնել և ինչ գնով են ուզում լավացնել: 

Խոսելով Ադրբեջանի կողմից օկուպացված տարածքների մասին՝ Բաբայանն ասաց, որ հակառակորդը, թշնամին բռնազավթել է, օկուպացրել է այդ տարածքները:

«Ես չեմ ուզում դիվանագիտական հնարքներ բանեցնել, բայց երբ որ թուրքը և ադրբեջանցին ասում է՝ այդ տարածքները՝ Երևանը, Ստեփանակերտն իրենցն է, սա մի բան է, շատ ավելի վտանգավոր է, երբ մենք ենք ասում, որ դա իրենց տարածքն է, օրինակ՝ Քարվաճառը: Այ, սա է ամենամեծ վտանգը: Նույնը Շուշիի մասին է և մնացածի»,- ասաց ԱԳ նախարարը:

Ցույց տալով Եռաբլուրում հանգչող տղաների գերեզմանը՝ Բաբայանն ասաց, որ այդ բոլոր մարդիկ իրենց արյունն են թափել այդ հողում: 

«Մարդիկ պետք է հողի գինը հասկանան: Սա ոչ միայն քաղաքական հարթությունում է: Հասարակ մարդը փողոցում չպետք է թքի, որովհետև այս հողում արյուն է թափվել: Երբ որ մենք գանք այդ հասկացությանը, այդ աշխարհընկալմանը, բազմաթիվ հարցեր կլուծվեն»,- ասաց նա: