Այս որակի իշխանության դեպքում հնարավոր է՝ Ծիծեռնակաբերդը դառնա հայ-թուրքական բարեկամության հուշակոթող, ԵՊՀ շենքը՝ թուրքական բաղնիք. քաղաքագետ

Թրքասիրության արշավը վատ իրավիճակ է ստեղծում բոլոր նրանց համար, ովքեր իրոք ուզում են խաղաղություն լինի տարածաշրջանում: Այս մասին լրագրողների հետ հանդիպման ժամանակ ասաց  քաղաքագետ Մանուկ Սուքիասյանը։

Նա նշեց, որ երբ իշխանությունը հանդես է գալիս «պացիֆիզմի» դիրքից, դու դրան ընդդիմանում ես, իրենք ասում են՝ մենք խաղաղասեր ենք, իրենք ռազմատենչ։

«Այնինչ, կապիտուլյացիայի պայմաններում դա խաղաղասիրություն չէ, խաղի կանոններ թելադրել է: Իլհամ Ալիևը բացահայտ հայտարարում է՝ մենք կպարտադրենք Զանգեզուրով միջանցք։ Փոխանակ դրան պատասխանեն, այստեղից ասում են՝ դե պետք է վերանայումներ անենք»,-ասաց քաղաքագետը:

Նա չի բացառում, որ այս որակի իշխանության դեպքում, որպես հայ-թուրքական մեղրամիսի դրսևորում, մի օր Ծիծեռնակաբերդի հուշահամալիրը դարձնեն հայ-թուրքական բարեկամության հուշակոթող, ԵՊՀ շենքը՝ թուրքական բաղնիք։

«Ադրբեջանաթուրքական տանդեմը մեզ պարտադրել է կապիտուլյացիա, պաշտոնական Բաքուն չի թաքցնում իր հավակնությունները Զանգեզուրի նկատմամբ, այդ պարագայում խաղաղասիրության ու կոմունիկացիաների մասին խոսելը... չգիտեմ այդ իշխանությունը կամ պետք է լինի ապուշ կամ պատվեր կատարող»,-  ընդգծեց քաղաքագետը։

Նրա խոսքով, ամեն աբսուրդ բան սպասելի է այս իշխանություններից, քանի որ այլևս չեն թաքցնում, որ թուրքերի հետ սերտ հարաբերությունների կողմնակից են: