«Զրուցել ենք՝ չենք հասկացել․․․»․ ԵԿՄ ԼՄ ղեկավար Կամո Հովհաննիսյանը՝ իր և մարզպետի վեճի մասին

Մամուլում շրջանառվող տեղեկությունների համաձայն օրերս ԵԿՄ Լոռու մարզային մասնաճյուղի ղեկավար Կամո Հովհաննիսյանի և Լոռու մարզպետ Արամ Խաչատրյանի միջև միջադեպ է տեղի ունեցել:

Այս մասին լուրը մեզ հետ զրույցում հաստատեց Վանաձորի մեր աղբյուրը, ով ասաց, թե նույնիսկ քաշքշուկ է տեղի ունեցել հենց մարզպետարանի դիմաց:

Սակայն, չգիտես ինչու, կողմերը փորձում են ծածկադմփոց անել միջադեպը:

Արամ Խաչատրյանն ընդհանրապես հերքել է հանդիպման մասին լուրն ու ասել, թե նման բան տեղի չի ունեցել և լուրերը «հորինված են»։

Ու թեև մեզ տեղեկություններով և ականատեսների խոսքով դեպքը տեղի է ունեցել 2 օր առաջ, սակայն Կամո Հովհաննիսյանն էլ NEWSPRESS.am-ի հետ զրույցում ասաց, թե արդեն 20 օր է՝ մարզպետին չի տեսել։

«Ո՞ւմ է հետաքրքիր, թե ինչ է եղել․․․ մարզպե՞տն ինչ կապ ունի»,-հարցրեց Կամ Հովհաննիսյանը։

Դիտարկմանը, թե նրանց տեսել են մարզպետարանի դիմաց՝ Կամո Հովհաննիսյանն ասաց․ «Զրուցել ենք՝ չենք հասկացել, բայց էդպես էլ ավարտվել ա՝ թողել, գնացել եմ։ Լուրջ բան չի եղել, որ տենց մե՜ծ ուզում են ներկայացնել»,-ասաց Կամո Հովհաննիսյանը։

Նրա խոսքով խնդիրը կապված է վաստակավոր մարզիչ Գևորգ Միսակյանի հետ։ Վերջինս կորոնավիրուսով հիվանդացել է։ Հովհաննիսյանի ներկայացմամբ, մարզիչի վիճակը ծանր է՝ թոքերում ջուր է հավաքվել և նրան տեղափոխման հարցի շուրջ է եղել խոսակցությունը։ Հովհաննսիյանը առաջարկել է օգնել մարզիչին տեղափոխել Սպիտակի հիվանդանոցից Երևանի հիվանդանոցներից մեկը։ Նրա առաջարկը, սակայն, չի ընդունվել մարզպետի կողմից։

«Խոսակցությունը տրանսպորտի հարցի շուրջ ա եղել խոսակցությունը»,-ասաց Կամո Հովհաննիսյանը։

Նա նշեց, որ մարզիչը կհանձնի կորոնայի երկրորդ թեստը, որից հետո ինքն անձամբ կլուծի Գևորգ Միսակյանի տեղափոխման հարցը։

«Հարցը լուծվող ա։ Էդ մարդը պետք է տեղափոխվի ամեն դեպքում»,-ասաց Կամո Հովհհաննիսյանը։