Գրեթե բոլոր սուպերմարկետներում մակնշումները կեղծում են

Մենք լուրեր ունենք, որ Հայաստանի գրեթե բոլոր խոշոր խանութներում մակնշումները փոխվում են, կեղծվում են ժամկետները: Այս մասին newspress.am-ին ասաց Սպառողների միության նախագահ Արմեն Պողոսյանը:

Ըստ նրա, նման իրավիճակը հնարավոր է ուղղել, եթե վերահսկող մարմինը՝ Սննդի անվտանգության պետական ծառայությունը, իրականացնի իր գործառույթը, ստուգումներ անցկացնի խանութների, սուպերմարկետների նկուղներում, որտեղ էլ այդ պրոցեդուրան տեղի է ունենում:

Արմեն Պողոսյանը նշեց նաև, որ ՍԱՊԾ-ն որպես իրավասու մարմին կարող է ստուգումներ անցկացնել, որին մասնակից կարող է դարձնի նաև սպառողական ՀԿ-ներին ու ԶԼՄ-ներին:

«Հիմնավորված կարծիք կա, որ խանութում փոխում են ամսաթիվը և սա արդեն քննչական մարմինների գործն է»,- ասաց նա:

Հարցին, թե հատկապես որ սուպերմարկետների մասին է խոսք գնում, նշեց, որ այս պահին չի կարող հրապարակել, թեև ինքը հստակ տեղեկություններ ունի, սակայն ներկայացնելու փաստեր չունի: Իսկ այն, որ նման խնդիր կա ու տարածված է՝ հստակ է:

Ըստ նրա, գնապիտակի առումով ևս խնդիր կա, քանի որ հաճախ նշվում է միայն քաշը կամ գինը, այլ տեղեկություն գնապիտակը չի տրամադրում, որը ևս խախտում է:
«Կան կեղծումների, թերի գնապիտակների վերաբերյալ լուրեր, սակայն փաստերի համար պետք է ՍԱՊԾ-ն իր գործառույթը իրականացնի, որը իր սրբազան պարտականությունն է»,- շեշտեց Սպառոների միության նախագահը:

Հիշեցնենք, որ վերջին շրջանում սպառողները պարբերաբար ահազանգում են, որ հատկապես «Երևանի Սիթի» սուպերմարկետների ցանցում սպառողներին թյուրիմացության մեջ են գցում ` գնապիտակի վրա մեկ այլ գին են նշում, դրամարկղում մեկ այլ գնով հաշվարկում: