«Խնդրում եմ խուճապի չմատնվեք». Փաշինյանի արձագանքը՝ հունվարի 2-ը, 3-ը, 4-ը աշխատանքային դարձնելու Քերոբյանի առաջարկին

Նախատեսվում է ոչ աշխատանքային օրերի ցանկից հանել հունվարի 2֊ը, 3֊ը, 4֊ը։ Այդ մասին կառավարության նիստի ժամանակ հայտարարեց Էկոնոմիկայի նախարար Վահան Քերոբյանը։

Նա նկատեց որ հունվարին 10 օր խրախճանքի մեջ են մարդիկ, ինչը վնասում է երկրի տնտեսությանը։ Նա մեջբերեց թվեր և նշեց, թե որքան է տուժում և որքան կարող է առաջընթաց գրանցել տնտեսությունը, եթե այդքան երկար մարդիկ չհանգստանան։

«Խնդրում եմ խուճապի չմատնվեք»,- նախարարին լրացնելով` ասաց Նիկոլ Փաշինյանը։
Նա հիշեցրեց, որ նախկինում էլ այս հարցը բարձրացվել է, ու սա նորություն չէ։

Աշխատանքի և սոցիալական հարցերի նախարար Մեսրոպ Առաքելյանն էլ նկատեց, որ սա խախտում է քաղաքացիների հանգստի իրավունքը։

Նա նշեց, որ ոչ աշխատանքային օրերը մինչև հունվարի 8֊ն են, որոնց մեջ կան նաև շաբաթ-կիրակի` ոչ աշխատանքային օրեր, և, ըստ էության աշխատանքային օրերը քիչ են։
Բացի այդ, նա նկատեց, որ այդ օրերին ակտիվ գործում են բանկերը, որոշ սննդի կետեր, որոնք հատկապես սպասարկում են օտարերկրացի զբոսաշրջիկներին և, ըստ էության, այդ ոչ աշխատանքային օրերն այնքան էլ վնաս չեն հասցնում։

«Ես չգիտեմ` դուք ինչպես եք ստացել այդ թվերը, բայց եթե դա բաժանում ենք աշխատանքային օրերին, ապա երևում է, որ այդ թվերը չափազանցված են»,- ասաց Մեսրոպ Առաքելյանը :

Ի վերջո որոշվեց որոշակի փոփոխություններով առաջարկը ներկայացնել քննարկման: