Հայաստանում ավելացել են պոչամբարները

2020 թ-ին նախատեսվում է գնահատել կենսաբազմազանության և էկոհամակարգային ծառայությունների վրա հանքարդյունահանման ազդեցությունը, մշակել և ներդնել դրա նվազեցման միջոցառումների պլան:

5 տարվա ընթացքում Հայաստանի հանքարդյունաբերական հողերն ավելացել են 3.5 հազար հեկտարով: Եթե 2011թ-ին հանքարդյունաբերական հողերը զբաղեցնում էին 33.0 հազար հեկտար տարածք, ապա 2015թ-ին այս ցուցանիշն աճել է` հասնելով 36.5 հազար հեկտարի: Այս տարիների ընթացքում ավելացել են նաև Հայաստանում առկա պոչամբարները: Դրանք 23-ն են, որոնցում կուտակված են շուրջ 220 միլիոն խմ թափոն:

Հանքարդյունաբերության պատճառով առաջացող հետևանքներն են`հողային ծածկույթի խախտումը, պոչամբարների ընդլայնումը, թափոնների կուտակումները, որոնք հազարավոր հեկտարներով մասնատում են բուսական և կենդանական պոպուլյացիաներն ու համակեցությունները, խախտում են կենդանիների միգրացիոն ուղիները և սպառնում են որոշ հազվագյուտ տեսակների գոյատևմանը:

Առավել մտահոգիչ է բաց եղանակով հանքերի շահագործումը անտառային տարածքներում, որտեղ կատարվում են անտառների հատման աշխատանքներ, պոչամբարների կառուցում, նոր ենթակառուցվածքների ստեղծում և այլն:

Մտահոգիչ է նաև հողերում վնասակար քիմիական նյութերի կուտակման, ստորերկրյա ջրերի և գետերի աղտոտման, արդյունաբերական թափոնների կուտակման և լանդշաֆտների դեգրադացման պատճառով տեղի ունեցող տեսակների աճ, զարգացման և վերարտադրության պայմանների խախտում, անտառային էկոհամակարգերում արժեքավոր, անհետացող և հազվագյուտ տեսակների ոչնչացում, ագրոցենոզների բերքատվության անկում, բերքի որակի վատթարացումը: