Ալեն, երբ գիրք գրելիս լինես՝ ձեր «անբարոյականության դրսևորումների» մասին չմոռանաս

Ազգային ժողովի փոխխոսնակ Ալեն Սիմոնյանը շատ ծանր է տարել, որ իր տան մոտ սև պաստառ են կախել: Նա այն որակել է «անբարոյականության դրսևորում»...

Թերևս սա այն եզակի դեպքն է, որ կհամաձայնենք Սիմոնյան Ալենի հետ: Սա անբարոյականություն է, որի հեղինակները այն ընդօրինակել են հենց Ալենից, նրա հետ քայլարածներից ու նրա հետ էլ իշխանության եկածներից... Վերջիններս նախկին իշխանության ներկայացուցիչների անուններով սև ժապավեններով ողողել էին քաղաքի բոլոր փողոցները... 

Այն ժամանակ կարելի էր, հիմա ո՞չ... 

Իհարկե Ալենը ևս չի մոռացել դա և, քանի որ արջն իր ահից է գոռում, ուստի նա իր անունով սև ժապավենի հետ կապված վրդովմունքն արտահայտելիս՝ նախապես նշել է, թե ինքն այն ժամանակ էլ իբր կողմնակից չի եղել նման երևույթների...

Իսկապե՞ս...

Ենթադրենք դա դու ինքդ չես արել, բայց ինչո՞ւ այդ պահին չկանգնեցիր ու չհայտարարեցիր, թե՝ չի կարելի, դադարեցրեք, սիրուն չէ...

Իսկ ինչո՞ւ մինչ օրս չես անդրադարձել այդ հարցին ու, արդեն որպես ԱԺ փոխնախագահ, չես բարձրաձայնել, որ նման գործողությունները ճիշտ չեն...

Ի վերջո, կարող էիր չէ՞, ինչ-որ բան անել, թեկուզ ֆեյսբուքում մեկնաբանություն թողնել, բայց չարեցիր, հիմա սիրտդ մղկտում է ու խոսում ես, որովհետև կաշվիդ վրա ես զգում, թե ինչ է նշանակում կենդանի լինել ու գրվել մեռած մարդկանց ցուցակում, հատկապես, որ քո մոտ նոր է սկսել կյանքը, նոր ես սկսել կլորանալ ու հասկանալ փողի համը՝ ոչինչ չանելով աշխատավարձ ստանալ, իսկ ստատուսների համար՝ պարգևավճար...

Այնպես որ՝ վրդովվիր, ճիշտ ես անում, այդպես վրդովվել ու նեղվել են իրենց երեխաների լացող աչքերին նայող հայրերն ու մայրերը, ովքեր փորձել են համոզել իրենց նեղսրտած երեխաներին, որ այդ սև ժապավենններն իրենց հետ կապ չունեն, որ դա ուրիշի համար է ու էլի նման բացատրություններ... 

Չենք փորձի երկար լինել ու բարոյահոգեբանական խրատներ կարդալ, միայն մի հորդոր.

Մի ալարի, ու գիրք գրի... բայց երբ գրելիս լինես «100 քայլ, թե ինչպես արագ ձախողել ընդդիմադիր պայքարը» խորագրով, չմոռանաս նաև գրել մեկ ուրիշ պատմության մասին գիրք «100 քայլ, թե ինչպես փլուզել երկիրն ու կոտորել սերունդը»...

Այնպես որ, երբ գրելիս լինես՝ ձեր «անբարոյականության դրսևորումների» մասին չմոռանաս, Ալե՛ն․․․