1915-ից հետո մեր ամենամեծ աղետը 2020 թվականն էր․ մեզ պետք է միասնություն, որ հաղթահարենք մեր ներսի նեոօսմանիզմը․ Դավիթ Շահնազարյան (տեսանյութ)

Քաղաքական գործիչ Դավիթ Շահնազարյանը համոզված է, որ այսօր ԱՄՆ նախագահ Բայդենը իր ուղերձում կարտասանի «ցեղասպանություն» բառը: Այդ մասին նա ասաց այսօր` ապրիլի 24֊ին Ծիծեռնակաբերդում հարգանքի տուրք մատուցելիս 1915 թվականի եղեռնի զոհերի հիշատակին։

Բայց միևնույն ժամանակ նա նկատում է, որ դա կապված է լինելու աշխարհաքաղաքական գործոնների հետ, ԱՄՆ-ի շահերի հետ եւ Թուրքիայի այսօրվա քաղաքականության հետ:

«Ինչևէ, դրանից հետո Հայաստանի արտաքին քաղաքականության համար նոր հնարավորություններ են բացվում, ինչը այս իշխանությունները անընդունակ են իրականացնելու. Ինչպես նաև ընդհանրապես արտաքին քաղաքականություն վարելու»,-ասաց նա:

Շահնազարյանի նկատում է, որ Թուրքիան բավական վաղուց է, ինչ վարում է նեոօսմանիզմի քաղաքականություն, որը կոչվում է նաև պանթուրանիզմ.

«1915-ից հետո մեր ամենամեծ աղետը 2020 թվականն էր․ առաջին հերթին մեզ պետք է միասնություն, որ հաղթահարենք մեր ներսի նեոօսմանիզմը: Այն 5 հազարից ավելի զոհերը, հայրենիքի կորուստը տեղի չէր ունենա, եթե Հայաստանն ունենար թեկուզ վատ, բայց իր շխանությունը, ոչ թե օտարի նշանակած իշխանությունը»,-ասաց Շահնազարյանը։

Նա հույս ունի, որ մոտ ապագայում կկարողանանք ազատվել պետական դավաճանություն կատարած այս իշխանություններից, որպեսզի կարողանանք պահպանել արդեն Հայաստանի տարածքային ամբողջականությունն ու պետականությունը: