Ես Միքայելյան Սասունն եմ, ես չեմ եկել այստեղ վերլուծեմ, թե ով ինչ է ասում (տեսանյութ)
Մեր դարավոր թշնամին երբեք չի փոխվել և չի էլ փոխվելու։ Այս մասին այսօր՝ ապրիլի 24-ին, Ծիծեռնակաբերդի հուշահամալիրում լրագրողների հետ զրույցում ասաց ԱԺ «Իմ քայլը» խմբակցության պատգամավոր, ԵԿՄ նախագահ Սասուն Միքայելյանը:
Լրագրողի դիտարկմանը, թե իշխանությունը բարեկամանալու կոչեր է հնչեցնում, ԵԿՄ նախագահը պատասխանեց․
«Ես Միքայելյան Սասունն եմ, ես չեմ եկել այստեղ վերլուծեմ, թե ով ինչ է ասում: Հարցն ինձ ուղղեք: Ես ասում եմ, որպես պատերազմ անցած մարդ, որ մենք ունենք դարավոր թշնամի, դա թուրքն է և միշտ պետք է փայտը ձեռքներիս լինի»,-ասաց Սասուն Միքայելյանը՝ նկատելով, որ մենք այդպես էլ պատմությունից դասեր չքաղեցինք։
Նա նկատեց, որ իրեն երկրի հետ կապված ամեն ինչ մտահոգում է։
«ԵԿՄ-ն մինչև էսօր սահմաններին է, Սյունիքում է: Պատերազմի սկզբից մինչև էսօր ԵԿՄ-ն սահմաններից դուրս չի եկել: Այսօր հերթափոխ է լինելու»,-ասաց նա:
Ինչ վերաբերվում է Նիկոլ Փաշինյանի Սյունիք կատարած այցին, ապա Սասուն Միքայելյանը սխալ է համարում տեղի ունեցածը Ըստ նրա, եթե սյունեցիներն իսկապես մտահոգ են, ապա պետք է համախմբվեին, դիմեին վարչապետին՝ հասկանալու, թե ինչ է լինելու Սյունիքի ճակատագիրը։
Իսկ այս դեպքում, ըստ նրա, կազմակերպված ակցիա է եղել վարչապետի դեմ։
«Նախ դա մի քանի մարդու ձեռագիր էր, որը ինչ-որ տեղ գալիս է նախորդ ինչ-որ մարդկանցից, որ ուզում են վերարտադրվել: Մենք պետք է կարողանանք գալ քաղաքական դաշտ: Եթե չկարողանանք գալ քաղաքական դաշտ, ապա բռնությունները, պահի տակ ոգևորվելը հատկապես այս վիճակում, մեզ ավելի վատ բաների առջև կկանգնեցնի»,-նշեց Միքայելյանը:
