Ուզեն, թե չուզեն՝ Նժդեհի արձանը լինելու է. ըստ Սոֆյա Հովսեփյանի՝ հարցը հակառուսական արհեստական աղմուկ է ծնելու

Ճիշտ են ասում Արցախում, որ արձանն իր տեղում է, բայց ստում են նրանք, ովքեր ասում են, որ նման խոսակցություններ չկան: Այդ մասին այսօր Ազգային ժողովում ճեպազրույցի ժամանակ ասաց ԱԺ անկախ պատգամավոր Սոֆյա Հովսեփյանը:

«Երեկ Արցախի Անվտանգության խորհրդի քարտուղարն այցելել է Մարտունի քաղաք, որպեսզի Նժդեհի արձանի այն՝ իմ մի շաբաթ առաջ ասած Մայիսի 9-ին ընդառաջ արձանը հանելու հանգուցալուծումն ունենա, սակայն չի ունեցել մարտունեցիների և նրանց պայքարի շնորհիվ: Այսօր այլևս քայլեր չեն ձեռնարկվել: Արձանը մնալու է՝ ի հեճուկս բոլորի: Իրենք արդեն քարերի հետ են կռիվ տալիս: Իրենց թվում է, որ սա զուտ Նժդեհի արձանն է, դե լավ, քարը կտանենք թանգարան, կվերջացնենք, աղմուկ չի լինի: Չէ՛, լինելու է աղմուկ: Սա ծնելու է արհեստական աղմուկ՝ հակառուսական, և եթե մի քանի կամակատար արջի ծառայություն են մատուցում ռուսական կողմին, սա դեմ է հայ ժողովրդի և ազգային արժեքների: Հույս չունենան, թե լռելու ենք»,- ասաց Հովսեփյանը:

Հարցին, թե արձանի դնել-հանելու հարցը որտեղի՞ց է գալիս, քամին որտեղի՞ց է փչում, նա պատասխանեց, որ թուրքական կողմից:

«Սա թեմա է, որը զգայուն է թե՛ հայերի, թե՛ ռուսների համար: Ես չգիտեմ, թե ռուսներն ինչ միֆ են հորինել, որ Նժդեհը ֆաշիստ է և նժդեհյան գաղափարախոսությունը ֆաշիստական է, և արձանը չպիտի լինի: Իրենց պետք է տեղեկացնել, որ եթե անգամ արձանը չլինի երեխաների աչքում, Նժդեհը մեր ներսում է և ամեն մի հայ Նժդեհ է: Ֆաշիստական Թուրքիան ամբողջ ժամանակահատվածում համագործակցել է այն ժամանակվա Ֆաշիստական Գերմանիայի հետ, և այսօր մի ամբողջ ֆաշիստական պետություն փորձում ու համարձակվում է մատնանշել մեկ անձի և խնդիր առաջացնել այդ մեկ անձի գոյության հետ, այն դեպքում, երբ Նժդեհը ոչ թե ֆաշիստ է եղել, այլ եղել է հայամետ և ազգասեր: Եթե ազգասեր է, ուրեմն ֆաշի՞ստ է, եթե չի սիրել թուրքին, ուրեմն ֆաշի՞ստ է: Այո՛, Նժդեհը չի սիրել, ես էլ չեմ սիրել և չեմ էլ սիրելու: Ուզեն թե չուզեն, պետք է համակերպվեն իրականության հետ, որ Նժդեհի արձանը լինելու է, արձանը լինի թե չլինի, մեր ներսում է Նժդեհը»,- եզրափակեց պատգամավորը: