Այս տարածությունը պարոն նախագահն է․ Էդգար Ղազարյանի 10 հիմնավորումը, թե ինչպես է Արմեն Սարգսյանն օգնում Փաշինյանին շարունակել պաշտոնավորումը (տեսանյութ)
ՍԴ աշխատակազմի նախկին ղեկավար Էդգար Ղազարյանը նախագահականի դիմաց ներկայացրեց 10 հիմնավորում, թե ինչու չպետք է Նիկոլ Փաշինյանը պաշտոնավարի։ Դիմելով նախագահին, ով ի դեպ Մոսկվա մեկնելու պատրվակով չէր ընդունել Էդգար Ղազարյանին, նա նշեց, որ նախագահ Արմեն Սարգսյանի քայլերը միտված են եղել Փաշինյանի պաշտոնավարման շարունակմանը:
Նա լրագրողների հետ զրույցում նկատեց, որ Նիկոլ Փաշինյանը չի գնում ընտրությունների, այլ գնում է իշխանությունը զավթելու։
Էդգար Ղազարյանի պարզաբանմամբ՝ հրաժարականից հետո Փաշինյանը իրավունք չուներ պաշտոնավարել։
Ըստ նրա՝ ընտրությունների միջոցով իշխանությունը զավթելու գործընթացը հնարավոր է կանխել, եթե մայիսի 10-ին բացի Նիկոլ Փաշինյանից խորհրդարանում առաջադրվի ևս մեկ թեկնածու, որն էլ ընտրվի վարչապետ:
Նկատելով, որ Արմեն Սարգսյանը հրաժարվում է իրականացնել այն քիչ լիազորությունները, որոնք դեռ ունի՝ Էդգար Ղազարյանը նշեց. «Իր սահմանադրական լիազորությունները չկատարող մարդը բողոքում է, որ իր սահմանադրական լիազորությունները քիչ են»:
Նա նկատեց նաև, որ Արմեն Սարգսյանը ոչ միայն չի նպաստել, որ Փաշինյանը հրաժարական տա, այլև ողջ ընթացքում կատարել է նրա քմահաճույքները:
«Ձեր հրամանագրով մի քանի ամիս առաջ ազգային հերոսի կոչմանը արժանացած ԶՈՒ ԳՇ պետի տեղակալին առանց բացատրության ազատել եք զբաղեցրած պաշտոնից: Վարչապետն իր ուղերձում ասում էր, որ խորհրդակցելով նաև ձեզ հետ՝ ներկայացնում է հրաժարական, բայց ձեր պաշտոնը ապաքաղաքական է, դուք ի՞նչ գործ ունեք քաղաքական ուժերի հետ համատեղ քննարկումներին և որոշումներին»,- ասաց ՍԴ նախկին աշխատակազմի ղեկավարը:
Ղազարյանը նաև նշեց, որ այսօր Արմեն Սարգսյանի չներկայանալը բացահայտ ցույց է տալիս, թե ինչքան մեծ ազդեցություն ունի Փաշինյանը նրա վրա, քանի որ համաձայնությունը տալուց 2 օր հետո հրաժարվել է հանդիպել ինձ հետ:
