Մենք ասում ենք, որ այդ թշնամությունը պետք է կառավարվի, և հստակ գնում ենք այդ ճանապարհով․ Փաշինյանը՝ Թուրքիայի հետ թշնամության մասին

ԱԺ-ում իր ելույթի ժամանակ ՀՀ վարչապետի պաշտոնակատար Նիկոլ Փաշինյանը նշեց, որ 2018-2021 թվականներին Ցեղասպանությունը ճանաչող և դատապարտող 9 հռչակագիր է ընդունվել, մինչդեռ 2008-2018 թվականներին ընդունվել է այդպիսի 20 բանաձև:

«Հայտնի շրջանակները մեզ մեղադրում են թրքասեր, թրքամետ լինելու մեջ։ Այս կոնտեքստում կասկածի տակ է դրվում խորհրդարանական մեծամասնության և Կառավարության վերաբերմունքը Հայոց ցեղասպանության նկատմամբ։ Այսինքն՝ 3 տարվա ընթացքում այս առումով արվել է նախորդ 10 տարում արվածի 50 %-ի չափով աշխատանք։ Ցեղասպանության միջազգային ճանաչման գործում տեղի է ունեցել գլխավոր իրադարձությունը՝ ԱՄՆ-ն ճանաչել է Հայոց ցեղասպանությունը։ Եթե ՀՀ կառավարությունը չուզենար, որ այդ բանաձևն ընդունվի, միանշանակ դա տեղի կունենար։ Հիմա մեզ թրքասիրության մեջ մեղադրողները ժամանակին ԱՄՆ-ի իշխանություններին համոզում էին, որ չընդունեն Հայոց ցեղասպանությունը»,-նշեց վարչապետի պաշտոնակատարը։

Անդրադառնալով քննարկումներին՝ Թուրքիան թշնամի երկի՞ր է, թե՝ ոչ, Փաշինյանն ասաց, որ դա որևէ մեկի հայտարարությամբ չի որոշվում, դա պատմական իրողություն է․

«Մենք ասում ենք, որ այդ թշնամությունը պետք է կառավարվի, և հստակ գնում ենք այդ ճանապարհով։ Չի կարելի թույլ տալ, որ այդ թշնամությունը անկառավարելիության դրսևորումներով ցուցադրվի»,-ասաց Փաշինյանը։