Բալե՛ս, Մի՛շս, այնքան դժվար է ապրել առանց քեզ, առանց քո զանգի, առանց քո բարևի․․․ հերոսի մայր լինել չեմ ուզում, ես իմ բալին եմ ուզում․ զոհվածի մոր գրառումը (ֆոտո)

Արցախյան երկրորդ պատերազմում զոհված զինվոր Միշա Գրիգորյանի մայրը՝ Աննա (Շուշան) Թամազյանը ֆեյսբուքյան գրառում է արել։ Նա մասնավորապես գրել է․

«Միշա՛ս, այսօր լրացավ մեկ ամիսը այն օրից, երբ քեզ գտանք ու հանձնեցինք հողին։

Կյա'նքս, դեռ չեմ հավատում, որ չկաս։ Ամեն օր գալիս եմ քեզ մոտ, լացում, զրուցում, հիշում համեստ ժպիտդ, հիշում թե ո՞նց էիր սիրում եղբորդ։ Խնդրում եմ Աստծուն, որ մի մեծ, շաաաատ մեծ հրաշք գործի ու դու վերադառնաս գիրկս իմ գանձ։ Իմ Արև, ախր առանց քեզ կյանքս դատարկ է, ախր առանձ քեզ ես կիսատ եմ իմ կես, ախր այնքան անելիքներ ունեինք թաաանկս։ Ո՞նց կարողացար ինձ մենակ թողնել, ախր գիտեիր, որ դու ես իմ հույսը։ Ախր այնքան բան ունեինք պլանավորած։

Բալե՛ս, Մի՛շս, այնքան դժվար է ապրել առանց քեզ, առանց քո զանգի, առանց քո՝ բարև մամ, ո՞նց եք մամ, բա Գոռը ու՞ր ա, ո՞նց ա ճուտիկը, Գոռիդ ճուտիկ էիր ասում, իմ աշխարհ։

Չնայած չեմ էլ ապրում, ի՞նչ ապրելու մասին է խոսքը, երբ ամեն ինչի համար ինձ մեղավոր եմ զգում։ Երբ ամեն բան դատարկ է ու տհաճ, երբ շուրջդ լիքը մարդ կա, բայց դու մենակ ես։ Երբ կարող ես ժպտալ, անգամ ծիծաղել, բայց հոգիտ արտասվում է, երբ հաց ես ուտում զուտ նրա համար, որ ուղղակի ուտես։

Մի'շս, ես քեզ եմ ուզում, քո ձայնն եմ ուզում, ես հերոս չեմ ուզում, հերոսի մայր լինել չեմ ուզում, ես իմ բալին եմ ուզում, հետ արի բալեեեես։ Արի ու կյանք տուր ինձ, առանց կյա'նք, կյանքը կյանք չէ»։