Այդ կադրերը դիտելուց՝ ոնց են վարվում զինվորականների հետ, չեմ կարողացել քնել, ՀՔԾ-ն դրանով զբաղվելու փոխարեն, զբաղվում է մահացած մարդկանց գույքերն ինձ վերագրելով. Արմեն Գևորգյան

Դեռևս անցած տարի ապրիլի 16-ին ՀՔԾ-ն քրգործ էր հարուցել ինչ-ինչ փաստերի կապակցությամբ, որտեղ ինչ-որ հանգամանքներ են նկարագրվում և վերջում ասում է, որ Արմեն Գևորգյանն այդ ամենի հետ առնչություն ունի: Մասնավորապես, որ իմ հարազատների, բարեկամների մի շարք գույքեր փաստացի պատկանում են ինձ: Այդ մասին այսօր Հատուկ քննչական ծառայության դիմաց ասաց «Հայաստան» դաշինքի շտաբի պետ Արմեն Գևորգյանը:   

«Այն ժամանակ փաստացի ինձ մեղադրանք չի առաջադրվել, որովհետև այն ժամանակ քննությունն էլ է հասկացել, որ դա աբսուրդի ժանրից է: Այդ գույքերի վրա, սակայն, կալանք է դրվել: Մենք մեր իրավունքները փորձել ենք պաշտպանել, դիմել ենք դատական ատյաններին: Բոլոր դատական ատյաններում այս պահի դրությամբ քննիչի համապատասխան որոշումը ճանաչվել է ապօրինի և բեկանվել է»,- ասաց նա: 

Ըստ Գևորգյանի՝ «մարդ պիտի էլեմենտար քթի ծակ ունենա», որ հասկանա՝ երբ քաղաքական ինչպիսի պայմաններում, ինչ վիճակում ինչպիսի որոշում է կայացվում:

«Դուք պատկերացնո՞ւմ եք՝ սահմաններում տիրող իրավիճակի պարագայում, երկրում այս մարտահրավերների պայմաններում, որոշել են ինձ մեղադրանք առաջադրեն, որպեսզի այդ գույքերի վրա կալանք դնելը հիմնավորված լինի: Եվ երկրորդը, հավանաբար, ինչ-որ խափանման միջոց ընտրեն, որով խափանեն իմ գործունեությունը՝ որպես «Հայաստան» դաշինքի շտաբի պետ»,- նշեց նա:  

«Հայաստան» դաշինքի շտաբի պետի խոսքով՝ ինքն ընդհանրապես հրաժարվել է որևէ գործ ունենալ Հատուկ քննչական ծառայության հետ:

«Կյանքը ցույց է տվել, որ այս կառույցը միայն քաղաքական պատվեր է կատարում, ուստի իրենց հետ նստել, մեղադրանք քննարկել և այլն, ժամանակի կորուստ է: «Հայաստան» դաշինքի ներկայացուցիչները համատարած հրավիրվում են քննչական մարմիններ, ոստիկաններ, ինչ-որ անհասկանալի բացատրական աշխատանքների, նյութերի նախապատրաստման, և այլն: Մեր «իշխանություններն» ամեն ինչ անում են, որպեսզի մարդկանց մոտ ցանկությունն ու վճռականությունը կոտրվի իրենց դեմ պայքարելու, բայց ես կարծում եմ՝ նմանատիպ «օյինբազություններից» դա ավելանում է, ամրապնդվում է: Մեր դաշինքը շատ կազմակերպված է արդեն, աշխատանքները դրված են շատ ճիշտ ռելսերի վրա, ուստի անգամ այսպիսի բաներով հնարավոր չի լինելու խաթարել այդ գործընթացը: Անչափ շատ եմ ցավում, որ այսօրվա վիճակում, այդ կադրերը դիտելուց, թե ոնց են վարվում մեր զինվրականների հետ, ես չեմ կարողացել քնել, ՀՔԾ-ն այդ փաստերով զբաղվելու փոխարեն, զբաղվում է մահացած մարդկանց գույքերը ինձ վերագրելով»,- եզրափակեց Գևորգյանը: