Արիանա Հովսեփյանն Ազատության հրապարակում հրավիրում է շտապ հավաք՝ հեռացնելու Կապիտուլյանտին. հայտարարություն

NEWSPRESS.am կայքի հիմնադիր-տնօրեն, հասարակական գործիչ Արիանա (Արմենուհի) Հովսեփյանը հայտարարություն է տարածել, որով այսօր՝ ժամը 18:00-ին մեր հայրենակիցներին հրավիրում է շտապ հավաքի Ազատության հրապարակում:

Նրա տարածած հայտարարության մեջ, մասնավորապես, ասվում է.

«Հարգելի հայրենակիցներ, 

Հայ ազգ,

Սիրելի ժողովուրդ,

Մեր հայրենիքին պատուհասած վտանգը սպառնում է վերջնականապես կործանել Հայաստան պետությունը: Ամեն օր, ամեն ժամ, մեր թշնամին ավելի ու ավելի համարձակ և սանձարձակ է դառնում՝ նորանոր տարածքներ զավթելով մեր՝ առանց այն էլ մի բուռ մնացած հայրենիքից: 

Դավաճանական իշխանության ձեռամբ ու նախընտրական պատրաստությամբ զբաղված ընդդիմության լուռ համաձայնությամբ մեր հայրենիքը կտրատվում է: Արցախի կորստով՝ Սյունիքը, Վայոց ձորն ու Գեղարքունիքը դարձել են սահմանամերձ ու գյուղացին մեն-մենակ, գրեթե անպաշտպան է մնացել դեռևս ամիսներ առաջ մեր հազարավոր հայորդիներին դաժանաբար սպանած ոսոխի դեմ: 

Վարչապետի աթոռին սոսնձված երևույթը փորձում է մեզ խաղաղություն «վաճառել», մինչդեռ այդ խաղաղության հասնելու ճանապարհին Ալիևի առաջ խոնարհված երևույթը զոհել է մեր հազարավոր հայորդիների կյանքը, զոհել է մեկ տասնյակ հազարից ավել երիտասարդների առողջությունը՝ շատերին մինչև կյանքի վերջ գամելով հաշմանդամի սայլակին: Նա զոհել է ոչ միայն բանակցության առարկա 5+2 շրջանները, այլև Հադրութը, բերդաքաղաք Շուշին, տարածքներ Ասկերանից, Մարտունուց, Մարտակերտից՝ այդպիսով Արցախից մնացած պատառիկը մշտական կախման մեջ գցելով Ադրբեջանից: Կապիտուլյանտը զոհել է հողեր Սյունիքից, այժմ թշնամին մեր կապուտաչյա գեղեցկուհուց՝ Սևանից քիչ է հեռու: Դրանից բացի, Նիկոլը հպարտորեն հայտնում է Տավուշից գյուղեր զիջելու, Տիգրանաշենը զիջելու պատրաստակամության մասին՝ այդպիսով հարվածի տակ դնելով Հայաստանի կապը երկու հարևան պետությունների՝ Վրաստանի և Պարսկաստանի հետ: Ասել է թե՝ նրա ձեռամբ Հայաստանը մտնելու է թուրքական տոտալ բլոկադայի մեջ: Եվ վերջում, ո՞վ է երաշխավորում, որ թուրքը խաղաղություն է նվիրելու մեզ: Թուրքիայի պատմությունն ու ծրագրերը լրիվ հակառակի մասին են խոսում: 

Իսկ քաղաքական հայտ ներկայացրած ընդդիմությունը զբաղված է... ՈՉՆՉՈՎ: Զբաղված է մարդկանց համբերությունն ու զայրույթը մաշելով, զբաղված է դատարկ ճառերով: 

Մեր հասարակության գիտակից հատվածն այլևս հոգնել է փողոց դուրս գալուց, ճառեր լսելուց, քայլելուց ու տուն գնալուց՝ արդարացի կասկածներ ունենալով, որ Կապիտուլյանի գործողություննները համաձայնեցված են հենց ընդդիմադիր քաղաքական ուժերի կամ առնվազն դրանց լիդերների հետ: 

Ուստի, ես՝ որպես պարզապես գիտակից ու մտահոգ հայ, իմ մի խումբ ընկերների հետ, ովքեր ևս քաղաքական հավակնություններ չունեն, հրավիրում եմ ձեզ Ազատության հրապարակ՝ Կապիտուլյանտին հեռացնելու ճանապարհը քննարկելու և դա իրագործելու: Իրագործելու՝ թեկուզև հենց այսօրվանից:

Այսօր՝ ժամը 18:00-ին, բոլորիդ խնդրում եմ լինել Ազատության հրապարակում ձեր ընկերների, հարազատների հետ, ովքեր անտարբեր չեն մեր պետության ու պետականության կորստի հանդեպ: Մինչև հունիսի 20-ը կարող է կործանարար լինել մեր հայկական երկու պետությունների համար:

Սիրով սպասում եմ: Սպասում եմ ամենահայրենասերներին, ամենավճռականներին ու թրքահպատակ իշխանությանը հեռացնելու իրական պատրաստակամություն ունեցողներին: 

Եկե՛ք Ազատության հրապարակ: 

Եկե՛ք վճռենք: 

Եկե՛ք հեռացնենք Կապիտուլյանտին»: 

Արիանա Հովսեփյան
22.05.2021