Սերժ Սարգսյանն ինտենսիվ ներգրավված է նախընտրական աշխատանքներում. «Փաստ»
«Փաստ» օրաթերթը գրում է.
«Ինչպես հայտնի է, ՀՀ երրորդ նախագահ Սերժ Սարգսյանը հայտարարել էր, որ այլևս չի զբաղեցնելու պետական բարձր պաշտոններ, քանի որ ավարտել է իր ծառայությունը Հայաստանի և հայ ժողովրդի առջև պետական բարձր պաշտոնում։ Այդ իսկ տրամաբանությամբ, «Պատիվ ունեմ» դաշինքի ցուցակը նա չէ գլխավորում: Միևնույն ժամանակ, երրորդ նախագահը նշել էր, որ ակտիվորեն մասնակցելու է քաղաքական գործընթացներին, այդ թվում՝ նախընտրական:
«Փաստ» թերթի տեղեկություններով, Սերժ Սարգսյանն արդեն իսկ ինտենսիվ ներգրավված է դաշինքի նախընտրական շտաբի աշխատանքներում: Մասնավորաբար, ըստ մեր աղբյուրների, այս օրերին իսկական եռուզեռ է ՀՀԿ կենտրոնական գրասենյակում, որտեղ կուսակցության ղեկավարն ընդունում է բազմաթիվ մարդկանց՝ քաղաքական, մշակութային, հասարակական գործիչների, շարքային քաղաքացիների: Ավելին, մենք ունենք տեղեկություններ, որ բացի գրասենյակային աշխատանքից, Սերժ Սարգսյանը սկսել է մարզային այցեր կատարել:
Ի մասնավորի, մեր հավաստի տեղեկություններով, անցած հանգստյան օրերին նա եղել է մարզերում: Մեր աղբյուրները փոխանցում են, որ ամբողջ նախընտրական ժամանակահատվածում նա ակտիվ այցելությունների, ինչպես նաև խորհրդակցությունների ու հանդիպումների մեջ է լինելու: Ասում են՝ դրանցից շատերը գուցե նաև չլուսաբանվեն»:
Մանրամասները՝ թերթի այսօրվա համարում
