Մենք գնում ենք ընտրություններին՝ կրելու համար. Քոչարյանի կարծիքով՝ խորհրդարան անցնող ուժերից որևէ մեկը չի համագործակցի դավաճանների հետ (տեսանյութ)

Պատկերացնենք, որ ամբողջ ընդդիմադիր դաշտը միացել է և ընտրություններին մասնակցում է միասնական ցուցակով, ձեզ մոտ հարց չէ՞ր առաջանա՝ բա հետո ո՞նց եք աշխատելու այդ ֆորմատով, ինչպե՞ս եք երկիր կառավարելու: Այդ դեպքում դուք իրոք իրավունք կունենայիք ասելու, որ ձեր նպատակն ուղղակի մեկ մարդու հեռացնելն է, այլ ոչ թե երկրի առաջ ծառացած խնդիրները լուծելն է: Այդ մասին այսօր մամուլի ասուլիսի ժամանակ ասաց ՀՀ երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանը: 

«Մենք գնում ենք ընտրություններին՝ կրելու համար և մտածում ենք՝ հետո ինչպես պետք է կատարենք մեր խոստումներն ու ինչպես պետք է շտկենք իրավիճակը»,- ասաց նա:

Հարցին, թե՝ ինչպես է պատկերացնում իրենց կրելը, եթե սոցհարցումների համաձայն Փաշինյանի և «Քաղաքացիական պայմանագրի» ռեյտինգը բարձր է, Քոչարյանը պատասխանեց. 

«Բոլոր այդ հարցումները, ինչքան ես գիտեմ, հեռախոսային են և հեռախոսային հարցումները, սովորաբար, ընդունված են աշխարհում, բայց դրանք այն երկրներում են արժանահավատ ամբողջութամբ, որտեղ չկա այսպիսի ներքին բևեռվածություն և այդ հասարակությունը բարձր ներքին վստահություն ունեցող հասարակություն է: Հիմա երբ որ մեկ լայքի համար մարդուն հեռացնում են աշխատանքից, եթե մարդ աշխատում է բյուջետային ոլորտում, եթե անմիջապես հարազատների վրա ճնշում է սկսում գործադրվել... Երկրորդ՝ մենք չենք ասում, որ այսօրվա պաշտոնակատարը վարկանիշ չունի, բայց մենք վստահ ենք, որ 25-30 տոկոս ունենալով խորհրդարանում, հնարավոր չէ վերընտրվել վարչապետ և ձևավորել կառավարություն, եթե քեզ հետ չեն այլ ուժեր, որոնք պատրաստ են քեզ հետ համագործակցել: Դեռ ընտրությունների մասնակիցների ցանկում չի երևում որևէ քաղաքական ուժ, որը նույն դաշտից է՝ պատրաստ է դավաճանների հետ համագործակցել և կարող է անցնել խորհրդարան: Նույնիսկ եթե 30 տոկոսը չհաջողվի մաշեցնել մինչև 15-20 տոկոս, այդ քաղաքական ուժն ի վիճակի չի լինելու ձևավորելու կառավարություն և վերահսկողություն սահմանել գործադիր իշխանության վրա: Սա ակնհայտ է, բայց ամեն ինչ անելու ենք մաշեցնելու մինչև քոքը»,- ընդգծեց Քոչարյանը: