Այդպես մտածող մարդը Հայաստանում ապրելու իրավունք չպետք է ունենա. Քոչարյանը՝ իմքայլական պատգամավորի՝ «ամայի տարածքների» վերաբերյալ հայտարարության մասին

Այսօր մամուլի ասուլիսի ժամանակ ՀՀ երկրորդ նախագահ, «Հայաստան» դաշինքի վարչապետի թեկնածու Ռոբերտ Քոչարյանն անդրադարձավ «Իմ քայլի» պատգամավոր Վլադիմիր Վարդանյանի այն հայտարարությանը, ըստ որի՝ մեր բանակը պաշտպանում է ժողովրդին, այլ ոչ թե ամայի որոշակի տարածքներ:

«Այս քաղաքական թիմի դեմքերից մեկը մի հանճարեղ հայտարարություն է արել. ասաց՝ բանակը հո ամայի տարածքները պաշտպանելու համա՞ր չի, բանակը մեր ժողովրդի  պաշտպանելու համար է: Մեկը կա, չէ՞, ակտիվ խոսում է ցանցերում, սա տիեզերական չգիտեմինչ է: Այդպես մտածող մարդը ոչ թե պատգամավոր չի կարող լինել, այդպես մտածող մարդն ուղղակի Հայաստանում ապրելու իրավունք չպետք է ունենա: Ի՞նչ է նշանակում ամայի տարածք: Քո երկրի մի զգալի մասը կարելի է անվանել ամայի տարածքներ և յուրաքանչյուր երկրի մոտավորապես 10 տոկոսն է բնակելի տարածք, դե մնացածը գնացեք հանձնեք: Սա հոգեբանության մի տեսակ է, որն ինձ անծանոթ էր: Ես չգիտեի, որ Հայաստանում գոյություն ունեն, կան, ընդհանրապես շնչում են, քայլում են նման կարգի մարդիկ, ունեն նման մտածելակերպ, դա ինձ համար հայտնագործություն էր»,- ասաց Քոչարյանը:

Ըստ նրա՝ սա կոնկրետ Հայաստանի տարածքային ամբողջականության խաթարում է, քրեորեն պատժելի արարք է, և այս մեղքը իշխանությունների ուսերին է:

«Դուք կարող եք բացել Սահմանադրությունը, Քրեական օրենսգիրքը, սրա տակից ոնց են դուրս գալու, ես չգիտեմ, ի վերջո առաջին հարցը հետևյալն է լինելու՝ ի՞նչ եք արել դա թույլ չտալու համար. որևէ քայլ չի արվել, բացի սեփական ժողովրդին մոլորեցնելու փորձերից»,- եզրափակեց վարչապետի թեկնածուն: