Չե՛ս աշխատելու և չենք էլ թողելու, որ աշխատես. եթե աշխատանքի դիմաց գումարներ է ակնկալում, ապա կարող էր ասել՝ դա վճարովի ծառայություն է. նախկին իմքայլականը՝ Վլ. Վարդանյանին (տեսանյութ)

Երեկ իմ գործընկերներից մեկը՝ Վլադիմիր Վարդանյանը, անդրադարձել է ինձ՝ ինձ համար անհասկանալի պատճառներով ու անհասկանալի ձևակերպումներով, ավելին՝ անցնելով բոլոր թույլատրելի սահմանները, վիրավորական արտահայտություններ է արել իմ հասցեին: Այդ մասին այսօր Ազգային ժողովի ամբիոնից ասաց անկախ պատգամավոր Թագուհի Թովմասյանը: 

Նա նշեց, որ Վարդանյանը խոսել է նախագծի մասին, որ ինքն օգնել է այս նախագծին, խմբագրական աշխատանքներ է արել: 

«Նախագիծը, որի մասին խոսում է Վարդանյանը, Ադրբեջանի քաղաքականությունը դատապարտելու մասին է՝ գերիների չվերադարձի մասով: Ես ենթադրում էի, որ այդ նախագիծը պիտի աներ իշխող խմբակցությունը և, առավել ևս, նույն Վարդանյանը՝ լինելով Պետաիրավական հանձնաժողովի նախագահ, բայց չի արել: Մենք ենք ներկայացրել՝ անկախ պատգամավորներով, և ինքն իր պաշտոնական պարտականություններից բխող աշխատանք է իրականացրել խորհրդարանում: Երբ Գոռ Գևորգյանը նրան առաջարկել է, որ նա էլ նայի տեքստը, սիրահոժար ասել է՝ ես էլ նայեմ, այո, միջազգային իրավունքի մասնագետ եմ: Եվ այսօր գալ ու երեսով տալ, որ «ձեր նախագիծն անգրագետ նախագիծ էր», «ուղղել եմ», «էլ չեմ ուղղելու». ներողություն, Դուք որևէ մեկին մեծահոգություն կամ բարեսրտություն չեք ցուցաբերում, Դուք ընդամենը կատարում եք Ձեր պարտավորությունները, որի համար վճարվում եք: Ես էլ՝ որպես ընկերության սեփականատեր, որպես հարկատու, Ձեզ վճարում եմ դրա համար և Դուք պարտավոր եք կատարել այն աշխատանքը, որի համար կոչված եք Ազգային ժողովում»,- ասաց Թովմասյանը:

Ըստ պատգամավորի՝ եթե Վարդանյանը խոսում է, անցնում է գծեր, ուրեմն թող մտածի՝ ասելու շատ բան կա:

«Եթե Վլադիմիր Վարդանյանն այդ նախագծի վրա աշխատանքը մատուցում է որպես վերին աստիճանի բարեգթություն մեզ համար և ակնկալում է ինչ-որ գումարներ, ապա կարող էր ասել, որ դա վճարովի ծառայություն է, մենք կմտածեինք՝ իր ծառայությունից օգտվո՞ւմ ենք ընդհանրապես, թե՞ ոչ: Անհասկանալի է ընդհանրապես իր վրդովմունքի պատճառը: Եթե այդքան համարձակություն ունեք, կարող եմ ուղեկցել սահման՝ իմ ծննդավայր, եկեք ադրբեջանցիների հետ Ձեր ագրեսիան ցուցաբերեք»,- շեշտեց պատգամավորը: 

Նա անդրադարձավ նաև նոր նախագծին, որ իրենք պետք է ներկայացնեն, իսկ Վարդանյանն իր հերթին հրաժարվել է դրա վրա աշխատելուց: Ի դեպ, այն Արցախի դեօկուպացիայի մասին է: 

«Վարդանյանն այստեղ հոխորտում էր, թե նոր նախագիծ եք բերել, նախագծի վրա չեմ աշխատելու: Բնականաբար, չե՛ս աշխատելու և չենք էլ թողելու, որ աշխատես: Եվ մենք, այո՛, վաղը քննարկելու ենք Արցախի դեօկուպացիայի մասին նախագիծը: Մենք հասնելու ենք այդ հայտարարության ընդունմանը: Դա դուք պիտի անեիք՝ որպես իշխանական խմբակցություն և Արցախի ապագան այս իշխանությունն ինքը պիտի ուրվագծեր հեռանալուց առաջ: Այս խորհրդարանին հիշելու են որպես Արցախը հանձնած խորհրդարան և մենք գոնե մի փաստաթուղթ պիտի ներկայացնենք, որ ամբողջ աշխարհում հասկանան, որ Արցախի վրա մենք դուռը չենք շրխկացրել»,- եզրափակեց Թովմասյանը: