Արտակ Դավթյանը պետք է պատասխանատվության ենթարկվի. Թագուհի Թովմասյան (տեսանյութ)
Մեզ մեր տարածքներից գերեվարում են. շատ բարդ ու վտանգավորվ իրավիճակում ենք գտնվում: Այս մասին ԱԺ-ում լրագրողների հետ ճեպազրույցում ասաց անկախ պատգամավոր, «Պատիվ ունեմ» նախընտրական դաշինքի ցուցակում ընդգրկված Թագուհի Թովմասյանը:
Նա նշեց, որ չգիտի, թե հետևանքները ինչ են լինելու, ակնկալում է պաշտպանության նախարարության ավելի մանրամասն պարզաբանումը ինչ հանգամանքներում են գերեվարվել հայ զինծառայողները, նմանատիպ իրավիճակներում հայկական կողմը համարժեք գործողություններ չեն իրականացնում, երբ որ կոնկրետ Գեղարքունիքի մի քանի հատվածներում թշնամին մխրճվել է հենց հայկական տարածք, ավելի առաջ եկել:
«Մենք, փաստորեն, գերի չենք վերցնում, իսկ իրենք գերի են վերցնում ու հայտարարում են, որ դիվերսանտ են: Անհամարժեքություն եմ ես նկատում»,- ասաց պատգամավորը:
Անկախ պատգամավորներով քննարկել են՝ ԱԺ արտահերթ նիստ հրավիրելու հարցը, որին ներկա պետք է լինեն պաշտպանության նախարարը, Գլխավոր շտաբի պետը, ու այս հարցերի վերաբերյալ պարզաբանումներ տան:
«Հայաստանի «Պաշտպանության մասին» օրենքով Զինված ուժերը պատասխանատու են մեր սահմանների անձեռնմելիության համար, պարտավոր են պաշտպանել մեր սահմանները: Հիմա ի՞նչ խոչընդոտներ, ի՞նչ փակ, գաղտնի, անելանելի իրավիճակներ կան: Պետք է խոսենք այդ մասին, հասկանանք՝ ումից ենք ինչ աջակցություն խնդրում, ուր ենք գնում»,- ասաց Թագուհի Թովմասյանը:
Ինչ վերաբերում է ՀԱՊԿ-ին դիմելուն, նա նշեց, որ իր համար միշտ եղել է մի ճշմարտություն՝ եթե դու չես ուզում ինքդ քեզ պաշտպանես, որևէ մեկը դա չի անի քո փոխարեն:
«Մենք կարող ենք դիմել ՀԱՊԿ-ին, ՄԱԿ-ին, տարբեր կառույցների, ընդհուպ ՆԱՏՕ, բայց ինչ է դա տալու մեզ, եթե ինքներս մենք մեր պաշտպանության համար չենք իրականացնում անհրաժեշտ բոլոր քայլերը:
Ծիծաղելի է դառնում, այսիքն մենք մեզ չենք պաշտպանում, ակնկալում ենք ուրիշները գան, մեզ պաշտպանեն ու մի հատ էլ մունաթ ենք գալիս: Դա տեղին չէ»,- ասաց նա:
Պատգամավորն ընդգծեց՝ այստեղ եթե կա թիվ մեկ թիրախ, Հայաստանի Զինված ուժերի անկազմակերպվածությունն է. «Հայաստանի Զինված ուժերի գլխավոր շտաբի պետը պետք է պատասխանատվության ենթարկվի այսօվա մեր սահմանների անձեռնխելիությունը խախտելու համար: Նա պետք է պատասխանատվության ենթարկվի, որ ադրբեջանական զինուժի ներկայացուցիչները ներթափանցել են մեր երկիր, պատասխանատվության ենթարկվի, որ պատշաճ չի իրականացրել իր աշխատանքները»:
