Ռոբերտ Քոչարյանը հանդիպել է Երևանի երեք համայնքների բնակիչների ու դաշինքի ակտիվի հետ

ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը և դաշինքի մաս կազմող «Վերածնվող Հայաստան» կուսակցությայն նախագահ Վահե Հակոբյանը այսօր՝ մայիսի 27-ին Երևանում հանդիպեցին Երևանի Կենտրոն, Նորք-Մարաշ և Արաբկիր համայնքների քաղաքացիների և դաշինքի՝ մայրաքաղաքի ակտիվի հետ։

Դաշինքի ֆեյսբուքյան էջի փոխանցմամբ, նախագահ Քոչարյանը հիշեցրել է հետհաշվարկի մասին՝ նշելով, որ այս իշխանությանը մնացել է 24 օր։

Նա շնորհակալություն է հայտնել ներկաներին «Հայաստան» դաշինքի աշխատանքներում ներգրավվելու համար։

«Վստահ եմ, որ ձեզ բոլորի վրա կարող է ճնշում լինել, բայց մենք պետք է վճռական լինենք։ Այսօր քննարկելու ենք այն հարցերը, թե ինչպես ենք մեր թեզերը և մեսիջները տեղ հասցնելու ընտրողներին, որպեսզի փոխենք այս իշխանությանը։ Երկուստեք պետք է վստահ լինենք, որ դուք կստանաք ձեզ անհանգստացնող բոլոր հարցերի պատասխանը, իսկ մենք վստահ լինենք, որ ունենք ուժեղ թիմ, որը պատրաստ է մեզ աջակցել հաջողության հասնելու համար», - ասել է նախագահ Քոչարյանը։

Վահե Հակոբյանն ընդգծել է, որ հայ զնիվորներին գերեվարելու այսօրվա տխուր լուրը ևս մեկ անգամ փաստում է, թե ուր է տանում մեզ այս իշխանությունը։

«Անհրաժեշտ է արագ արձագանքել բոլոր իրավիճակներին, մանավանդ որ գյուղական համայնքներում ոչ բոլոր լրատվամիջոցներն են հասանելի»,- եզրափակել է Հակոբյանը։

Հանդիպմանը հատուկ ուշադրություն է դարձվել ՀՀ սահմանների անվտանգության և ռազմաարդյունաբերության զարգացման հարցերին։