Ոստիկանությունն անհանգստացել է «Շիշ բռնողի» հետ առնչություն ունեցող բանդայի բերման ենթարկելու մասին տեղեկատվության արտահոսքից. Ծառայողական քննություն է սկսվել. «Փաստինֆո»

«Փաստինֆո»-ի հաղորդմամբ՝ «Շիշ բռնող»-ի հետ առնչություն ունեցող բանդայի անդամներին բերման ենթարկելու մասին լուրերի տարածումն իրարանցում է առաջացրել Ոստիկանությունում. փորձում են պարզել արտահոսքի աղբյուրը։

Ինչպես արդեն տեղեկացրել ենք՝ Կոմիտասի պողոտայից , ապօրինի զենք պահելու, կրելու կասկածանքով անձինք են բերման ենթարկվել ոստիկանության Արաբկիրի բաժին, նյութեր են նախապատրաստվում։ Ըստ շրջանառվող լուրերի՝ ձերբակալվածները «մարդասպանների» բանդայի անդամներ են, որոնք գործում են ԱԺ «Իմ քայլը» խմբակցության պատգամավոր Հայկ Սարգսյանի՝ «Շիշ բռնողի» հովանու ներքո։
Նշենք, որ «Փաստինֆո»-ի՝ ոստիկանության աղբյուրները տեղեկացնում են, որ Արաբկիրի ոստիկանապետը բարեկամական հարաբերություններ ունի ՀՀ վարչապետի աշխատակազմի նախկին ղեկավար Էդուարդ Աղաջանյանի հետ։

Նրանց վնասազերծումը տեղի է ունեցել օրեր առաջ, սակայն դեպքի մասին հաղորդագրություն ոստիկանությունը չէր տարածել, ավելին՝ Արաբկիրի ոստիկանապետը հանձնարարել էր՝ բացառել տեղեկատվության հնարավոր արտահոսքը, ինչը, փաստորեն չի ստացվել, մամուլում արագորեն տարածվել է լուրը, ինչպես նաև՝ տեսանյութերը՝ վերջիններիս բերման ենթարկվելու մասին։ Սա, ըստ տելեգրամյան ալիքների, նյարդայնացրել էր Հայկ Սարգսյանին, որը նախօրեին այցելել էր Ոստիկանության Արաբկիրի բաժանմունք և պարզաբանումներ պահանջել։

Իրավապահները մտահոգված են հատկապես տեսանյութերի տարածման համար և փորձում են պարզել, թե ով է եղել արտահոսքի աղբյուրը։ «Փաստինֆո»-ն կապ է հաստատել ՀՀ ոստիկանության հետ, որտեղից հաստատել են, որ նշանակվել է ծառայողական քննություն։