Ես հեռախոսը վերցնում եմ, ջնջում եմ տվյալ հոլովակը, որը նկարել էր, իմ կամքին անկախ. Շիշ բռնողը՝ լրագրողի հեռախոսը խլելու մասին

Երեկ երեկոյան՝ ժամը 19:00-ին, երբ ես քաղաքի կենտրոնում էի իմ ընկերների հետ՝ ոչ աշխատանքային ժամին, ոչ աշխատանքային պայմաններում, նկատում եմ, որ ինչ-որ կին ինձ և իմ ընկերներին հեռվից նկարում է, մոտենում է ինձ նկարելով ու սկսում պտտվելով նկարելը ինձ և իմ շրջապատի մարդկանց, որը հաճելի չէր: Այդ մասին այսօր Ազգային ժողովում լրագրողների հետ ճեպազրույցում ասաց ԱԺ «Իմ քայլը» խմբակցության պատգամավոր Հայկ Սարգսյանը՝ անդրադառնալով երեկ երեկոյան տեղի ունեցած միջադեպին, երբ ինքը խլել է լրագրող Անուշ Դաշտենցի հեռախոսը:

«Այնուհետև տվյալ կինը՝ հեռախոսը պահած, նկարելով մոտենում է ինձ ու ասում է՝ բարև Ձեզ, ես «Հրապարակ» օրաթերթից եմ: Ասում եմ՝ բարև Ձեզ, խնդրում մի նկարահանեք: Հեռախոսը այ սենց պահելով՝ նկարում է: Ես ասում եմ՝ խնդրում եմ, ինձ մի նկարահանեք, ես աշխատանքի ժամի չեմ, գործի տեղը չեմ, և ես որպես քաղաքացի, իրավունք ունեմ, այսինքն՝ իմ սահմանադրական իրավունքն է որպես քաղաքացի շրջել քաղաքում, և որևէ մեկը չի կարող իմ ազատությունը սահմանափակել: Ես, բացի պատգամավոր լինելուց, առաջին հերթին ՀՀ քաղաքացի եմ և պաշտպանված եմ Հայաստանի Հանրապետության Սահմանադրությամբ և օրենքներով: Ես ասում եմ՝ չեմ ուզում Ձեր հարցերին պատասխանել: Այնուհետև տվյալ կինը շարունակում է հարցեր ուղղել և հեռախոսը այ սենց պահել իմ դեմքին, ինչի արդյունքում ես հեռախոսը վերցնում եմ, ջնջում եմ տվյալ հոլովակը, որը նկարել էր, իմ կամքին անկախ: Հետո հեռախոսը տվել եմ իմ գործընկերներից մեկին, ասել եմ՝ խնդրում եմ փոխանցեք ու փոխանցելուց ասել եմ խնդրեք, որ իրեն լրագրողին հարիր ձևով պահի»,- ասաց Սարգսյանը՝ փախչելով լրագրողների այլ հարցերից: