Խայտառակություն է․ իշխանությունները փորձում են իմիտացիա ստեղծել, թե երկրում ամեն ինչ կարգին է․ Ռոբերտ Ղազանչյան

Դա խայտառակություն էր։ NEWSPRESS.am-ի հետ զրույցում, այսպես որակեց հունիսի 4-ին Երևանում տեղի ունեցած գինու տոնին նվիրված խրախճանքը Ռոբերտ Ղազանչյանը, ով «Մեր տունը Հայաստանն է» կուսակցության համամասնական ցուցակում ընդգրկված է 10-րդ համարի ներքո։

Նրա դիտարկմամբ, այս պահին երկիրը գտնվում է այնպիսի կոլապսային իրավիճակում, երբ սահմանը պաշտպանված չէ, երկիրն անվտանգ չէ ու ամեն պահի թշնամին կարող է գերեվարել մեր զինվորներին։

Ռոբերտ Ղազանչյանը վկայակոչում է ՀՀ Պաշտպանության նախարարության հրապարակած տեսանյութը, որտեղ ադրբեջանցի և հայկական կողմի զինվորների միջև Հայաստանի սուվերեն տարածքում ծեծկռտուք էր եղել։

Մինչդեռ, միևնույն պահին Երևանում գինարբուք է տեղի ունենում։

«Խնդիրը գիտե՞ք նաև որն է․ այն է, թե ովքեր են մասնակցում այդ խրախճանքին։ Այնտեղ այն օլիգարխներն են եղել, ովքեր հանդիսանում են իշխանության հովանավորյալները․․․ այնտեղ կային նաև կառավարության պետհամարանիշներով շատ ավտոմեքենաներ․ ես անցել եմ այդտեղով՝ հասկանալու համար, թե ինչ է տեղի ունենում․ ասո՛ւմ եմ ձեզ՝ խայտառակություն էր»,-մեզ հետ զրույցում ասաց Ռոբերտ Ղազանչյանը։

Նա նկատում է, որ ոստիկանությանը հրահանգված էր ոչ մի կերպ չմիջամտել խրախճանին ու չխանգարել «տոնակատարության» անցկացմանը։

«Դա նրանց համար տոն էր, որը չպետք է խանգարեին, ու որը տևել է մինչև գիշերվա 2-3-ը։ Դա այն դեպքում, երբ ոստիկանությանն օրենքով վերապահված է վերահսկել, որպեսզի ժամը 24։00-ից հետո հասարակական կարգը պահպանվի և մարդկանց հանգիստը չխանգարեն։ Այսինքն՝ բարձր երաժշտություն, ազդանշաններ և այլն, 24:00-ից հետո չի թույլատրվում, սակայն ոստիկանությունը ոչ մի գործողություն միտումնավոր չէր իրականացնում՝ դրանք արգելելու և հասարակական կարգը պահելու համար, երևի որպեսզի իշխանության հետ հետո  խնդիրներ չունենան»,-ասում է մեր զրուցակիցը։

Նա վստահեցնում է, որ այդ խրախճանքի մասնակիցների մեծ մասը հենց իշխանության ներկայացուցիչներից էին։ Ըստ Ռոբերտ Ղազանչյանի՝ նման տոնախմբությունները հասարակության մոտ իմիտացիա ստեղծելու միջոց է, թե ամեն ինչ կարգին է, լավ է ու կյանքը շարունակվում է։

«Նույնը երեխաների տոնի հետ կապված միջոցառումն էր, երբ Նիկոլ Փաշինյանի տիկին Աննա Հակոբյանն իր և իր երեխաների մասնակցությամբ Հրապարակում աջակցում էր միջոցառման իրականացմանը։ Հիմա այս նույն սցենարով շարունակվում է․ այս մարդիկ կոնկրետ միջոցառումներ են փնտրում, որպեսզի դրանց միջոցով մարդկանց ցույց տան, թե իրենք գտնվում են նախկին տեմպի մեջ, ամեն ինչ նորմալ է, ամեն ինչ կարգին է։ Նրանք չեն բարձրաձայնում, թե այսօր սահմանին ինչ ահռելի խնդիրներ կան»,- ընդգծեց Ռոբերտ Ղազանչյանը։

Նա կոչ արեց քաղաքացիներին սթափ դատել և աչալուրջ լինել։ Մեր զրուցակցի դիտարկմամբ, յուրաքանչյուր քաղաքացի ինքը պետք է գիտակցի իր քայլերն ու դրանց պատասխանատվությունը։ 

«Եթե, Աստված չանի, հետո խնդիրներ լինեն, մարդիկ պետք է հասկանան, որ իրենք ևս ունեն իրենց մեղքի բաժինը»,-եզրափակեց Ղազանչյանը։