Երևանում հաղթում է «Հայաստան» դաշինքը, մարզերում՝ ՔՊ-ն. քաղաքացիների դիրքորոշումը առաջիկա ընտրություններում՝ ըստ Интер-Акция-ի հարցումների

Քաղաքագետ, վերլուծաբան Նիկոլայ Սպիրիդոնովն այսօր մամուլի ասուլիսի ընթացքում անդրադարձել է հունիսի 20-ին կայանալիք արտահերթ խորհրդարանական ընտրություններին` ներկայացնելով Երևանում և ՀՀ մարզերում հայաստանյան գործընկերների հետ «Ինտեր ակցիա» հանրային զարգացման կենտրոնի անցկացրած սոցհարցումների արդյունքները:

Ըստ այդ հարցման տվյալների՝ Երևանում «Քաղաքացիական պայմանագիր» կուսակցության օգտին պատրաստ է քվեարկելու հարցվածների 16.3 տոկոսը, «Հայաստան» դաշինքի օգտին՝ 21.6 տոկոսը, «Պատիվ ունեմ» դաշինքի օգտին՝ 10.8 տոկոսը, «Բարգավաճ Հայաստան»-ի օգտին՝ 4.2 տոկոսը, «Լուսավոր Հայաստան»-ի օգտին՝ 4.6 տոկոսը, «Սասնա ծռեր»-ի օգտին՝ 2.1 տոկոսը, ՀԱԿ-ի օգտին՝ 1.7 տոկոս: Մնացած ուժերը 1 տոկոսից էլ պակաս ձայներ են ստացել: Չի կողմնորոշվել հարցվածների 22.6 տոկոսը: 

Մարզերում, ըստ հարցումների, «Քաղաքացիական պայմանագիր»-ը ստացել է 27.3%-ը,  «Հայաստան» դաշինքը՝ 14.1%, «Պատիվ ունեմ» դաշինքը` 8.2%, «Բարգավաճ Հայաստանը»` 6.1%, «Լուսավոր Հայաստան»-ը` 3,7%, «Սասնա ծռեր» կուսակցությունը՝1.3 %-ը, ՀԱԿ-ը՝ 0.7%: Մնացած ուժերը 1 տոկոսից էլ պակաս ձայներ են ստացել: Չի կողմնորոշվել հարցվածների 25,1 տոկոսը: 

Հարցվածների 63%-ը նշել է, որ ընտրություններից հետո երկրի ներքաղաքական իրավիճակը կկարգավորվի, 18%-ը հակառակ կարծիքին է:

Նիկոլայ Սպիրիդոնովը նշել է, որ հիմնական մրցակցությունն ընթանալու է  «Քաղաքացիական պայմանագիր» կուսակցության, «Հայաստան» և «Պատիվ ունեմ» դաշինքների միջև: