Յուրահատուկ տեղ պետք է հատկացվի Իրանի հետ հարաբերություններին. Վարդան Ոսկանյան

Իրանագետ, «Պատիվ ունեմ» դաշինքի անդամ Վարդան Ոսկանյանը ֆեյսբուքյան իր էջում գրել է․

«Հայաստանում դեռևս իրեն իշխանություն համարող ապաշնորհ վարչախմբի կառավարումը խաթարել է Հայաստանի և Արցախի անվտանգության ամբողջ համակարգը՝ գրեթե լիովին քայքայելով և անգործունակ դարձնելով այն։

Այս առումով «Պատիվ ունեմ» դաշինքի գաղափարական մոտեցումներում առանցքային բաղադրիչներից մեկն էլ հենց մեր անվտանգային լիարժեք համակարգի շատ դեպքերում նորովի ստեղծումն է, որը ձգտելու է ունենալ առկա և պոտենցիալ մարտահրավերները դիմագրավելու ամենաբարձր մակարդակը։

Դրանում յուրահատուկ տեղ է հատկացվելու նաև հարևան և բարեկամ Իրանի հետ հարաբերություններին՝ հաշվի առնելով այն, որ Հայաստանը և Հարավային Կովկասն ընդհանրապես իրանական արտաքին քաղաքական օրակարգում այժմ ավելի արդիական են դիտարկվում, ինչի հետևանքով ստեղծվել են նաև համագործակցության նոր հնարավորություններ։

Դրանցից չափազանց կարևոր են հատկապես մերձավորարևելյան թուրքամետ ահաբեկչական խմբավորումների դեմ համատեղ պայքարի մեխանիզմների մշակումը և արցախահայության ու Սյունիքի անվտանգության ապահովման գործում հակաադրբեջանական և հակաթուրքական գործողությունների տիրույթը, որոնք, ըստ էության, փոխկապակցված են։

Ընդ որում, նշված ուղղություններով հայ-իրանական գործակցության համար Իրանի պետական բոլոր մարմիններն ունեն Մերձավոր Արևելքի այդ գերտերության հոգևոր առաջնորդի ուղենշային «օրհնությունը», որն արտահայտվել է 44-օրյա պատերազմի վերջնահատվածում այաթոլլահ Ալի Խամենեիի ուղերձում, որտեղ հստակորեն արձանագրված են ոչ միայն ահաբեկիչներին մեր տարածաշրջանից դուրս շպրտելու, այլ նաև Արցախի հայության անվտանգության և Հայաստանի սահմանների անխախտության ապահովման հրամայականները։

#հարափոփոխ_տարածաշրջանը
#Պատիվ_ունեմ»։