Սրանք նոր Մարտի 1 սարքելու ուղղակի կոչեր են. Զոհրաբյանը դուրս է գրել Փաշինյանի՝ բռնության կոչերը

Այս քարոզարշավն աննախադեպ է ատելության խոսքի առումով: Վարչապետի ժ/պ-ն օգտագործում է ուղղակիորեն անթույլատրելի բառապաշար և բացահայտ ատելության բառամթերք է օգտագործում, էլ չեմ խոսում հայհոյանքի և ոչ ցիվիլ բառապաշի մասին՝ ըստ էության էսկալացիայի ենթարկելով քարոզարշավը՝ հասարակության մի հատվածին ուղղորդելով դեպի մի հատվածը: Այդ մասին Ընտրությունների վերահսկման կոմիտեի անդամների ճեպազրույցի ժամանակ ասաց ԱԺ անկախ պատգամավոր Նաիրա Զոհրաբյանը: 

Նա հիշեցրեց Քրեական օրենսգրքի հոդվածը՝ բռնություն գործադրելու հրապարակային կոչերի մասին: 

Զոհրաբյանը մեջբերեց Փաշինյանի հետևյալ արտահայտությունները՝ «Ասում ա՝ դուելի ա հրավիրում, տո լավ էլ ընդունում եմ, զենքի տեսակն էլ ընտրում եմ, կանչում եմ էստեղ ու ճակատից շարում եմ»: 

«Դիմելով թեկնածուին՝ ասում է՝ «դուք ոչ մի բան ես», «դու ոչնչություն ես», «դու տղա չես», «դու տղամարդ չես», «արի բանավեճի և ես խոսքով քեզ կոչնչացնեմ, մեյդդ կփռեմ գետիններին» և նաև պետական համակարգի այն աշխատողներին, ովքեր հրաժարվում են «մասովկա» ապահովել Նիկոլ Փաշինյանի հանրահավաքներին, վիրավորելով բոլորին ասում է՝ «պետական միջանցքներում գոյություն ունեցող կոռումպացված ստահակներ, բոլորիդ մի տեղ հունիսի 20-ին ընտրական քվեով վռնդելու ենք Հայաստանից», «ջարդելու ենք ռոբասերժական ոհմակի ատամնաշարը»: Ի դեպ, այս կոչից հետո տեսանք, որ բռնություն գործադրվեց լրագրողների նկատմամբ: «Գնացեք ընտրական տեղամաս, մեր թավշյա մանդատը փոխարինեք պողպատե մանդատով և կտեսնեք քաղաքական վենդետաներ, քաղաքաացիական վենդետաներ, կտեսնեք կադրային ջարդուփշուր», «բոլոր ստահակները քշվելու են պետական կառավարման համակարգից, բոլորը հատ-հատ վզներից բռնած դուրս են շպրտվելու պետական կառավարման համակարգից», «պատրաստվեք քաղաքացիական վրեժի,  քաղաքացիական  վենդետաների, կադրային ջարդերի», «Ընտրություններից հետո լինելու են ամենադաժան վենդետաները որոշ համայնքապետերի նկատմամբ, մասնավոր սեկտորի նկատմամբ»:

Ըստ Զոհրաբյանի՝ դրանք այն համայնքապետերն են, ովքեր հրաժարվում են իր հանրահավաքներին բռնի ուժով բերման ենթարկել աշխատակիցներին: 

«Ով ուզում է լինի, հետևներից գնալու ենք, բռնելու ենք վզակոթներից, բառի ուղիղ և փոխաբերական իմաստով քցելու ենք ոտքի տակ»,- մեջբերեց պատգամավորը:

Ամփոփելով՝ Զոհրաբյանն ասեց, որ սա ուղղակի բռնության կոչեր են՝ հիշեցնելով, թե ինչպես են Փաշինյանի աջակիցները կամ ոստիկանությունը հաշվեհարդար տեսնում նրա հասցեին արտահայտությունների արած քաղաքացիների նկատմամբ:  

«Սրանք քաղաքացիական բախումներ հրահրելու կոչեր են, սրանք նոր Մարտի 1 սարքելու ուղղակի կոչեր են: Ես, ճանաչելով Փաշինյանին, կարող եմ ասել, թե որ դեպքում է ինքը հայտնվում նման ծանր հոգեբանական կրիզիսի մեջ՝ երբ որ տեսնում է իր մանիպուլյացիոն կոդերը չեն աշխատում և երբ տեսնում է, որ հասարակության ստվար հատվածի հանդեպ ինքը չունի այն մոգական մանիպուլատիվ ազդեցությունը, որ ունեցել է, իրեն մնում է մեկ բան՝ մինչ ընտրությունները կամ ընտրություններից հետո հրահրել քաղաքացիական բախումներ, ինչ անում է»,- ասել է Զոհրաբյանը: