Շքեղությունների սիրահար Գռզոյի քարոզարշավը Սարյանում վերածվել է արարողության. բուկլետ բաժանել են գեղեցկուհիները, հսկել՝ թիկնապահներն ու ոստիկանները

NEWSPRESS.am-ի տեղեկություններով՝ երեկ «Քաղաքացիական պայմանագիր» կուսակցության շարքերում ապաստանած օլիգարխ Խաչատուր Սուքիասյանը փորձել է քարոզարշավ անել Երևանում՝ Սարյան փողոցում: 

Դե քանի որ իր «կլասսը» թույլ չի տվել անձամբ բուկլետ բաժանել, դա արել են նրան ուղեկցող երկու գեղեցկուհին: 

Սակայն զավեշտն ու ողբերգությունն այն է, որ բացի անձնական թիկնազորից, Սուքիասյանին ու գեղեցկուհիներին ուղեկցել են ոստիկաններ: Հետաքրքիր է՝ որևէ կարգավիճակ չունեցող, շարքային պատգամավորության թեկնածու և ընդամենը բուկլետ բաժանող Սուքիասյանին բյուջեից վարձատրվող ոստիկանները որպես ո՞վ են հսկում: 

Հայաստանում ընտրություններին մասնակցելու հայտ ներկայացրած գրեթե 3 տասնյակ քաղաքական ուժերի 100-ից ավելի թեկնածուներին ոստիկանությունը պատրա՞ստ է ծառայող տրամադրել՝ միայն բուկլետ բաժանելու համար: 

Թե՞ ոստիկանությունում և Սուքիասյանն ինքը հասկանում է, որ այլևս չի կարող անվտանգ քայլել Երևանում, որովհետև միացել է մի քաղաքական ուժի, որը պատասխանատու և մեղավոր է, ընդ որում՝ հենց թիվ մեկ մեղավորն ու պատասխանատուն է այն արհավիրքի, որը կատարվեց հայ ժողովրդի հայաստանաբնակ և արցախաբնակ հատվածի հետ: Մաս է կազմել մի ուժի, որը, այո, մեղավոր է ու պետք է պատասխանատվություն կրի 5000 կյանքերի կորստի համար, Արցախի 75 տոկոսի կորստի համար, այն անգործության համար, որի պատճառով Հայաստանի սահմանին մարդ է սպանվում կամ գերեվարվում: Այն սարսափի համար, որը տիրում է դիահերձարաններում: Այն անտերության համար, որին մատնված են Հայաստանի սահմաններն ու ներքաղաքական կյանքը: Այն անճարակության համար, որ իր շեֆը, թեև գերիներին վերադարձնելու համար ստորագրած փաստաթուղթ արդեն ունի, բայց ամեն անգամ նորանոր զիջումներ է անում ու հաղթանակներ պարգևում Ալիևին: 

Բայց այս ամենը բիզնեսմեն Սուքիասյանին չի հուզում, ավելի ճիշտ՝ հուզում է, այն էլ ինչպե՜ս է հուզում: Չէ՞ որ ամեն ինչ իր ու իր գրպանի շահերից են բխում: Թքած մնացածի վրա:

Փողը կա, գործընկեր-թուրքերն արդեն Հայաստանում են, բուկլետ բաժանող գեղեցկուհիներն ունի, թիկնապահներն ունի, ոստիկանությանը գրպանը դրած օգտագործում է, պաշտոնն էլ՝ շատ շուտով կունենա: 

Մնացածը մանրուքներ են: