Հիմնավոր կասկածներ ունենք, որ նույն զինվորները քվեարկել են մի քանի տեղամասերում․ Վահե Հակոբյան (տեսանյութ)

Սյունիքում ՔՊ-ն հավաքել է 54 %, իսկ Հայաստան դաշինքը՝ 43% ձայն, ինչը խոսակցությունների առիթ դարձավ, թե դաշինքն այնքան էլ համախոհներ չունի Սյունիքում՝ ինչպես թվում էր։

Այս հարցին անդրադառնալով՝ «Հայաստան», դաշինքի անդամ, պատգամավորի թեկնածու Վահե Հակոբյանը նկատեց, որ ձայների նման հարաբերակացությունը կանխատեսելի էր, քանի որ իշխանության կողմից եղել են ճնշումներ։

«Նախ համատարած և անթաքույց սպառնալիքներ են եղել պետապարատի աշխատակիցների նկատմամբ, հետո զինվորների ընտրության գործոն կար՝ 7 ընտրատեղամասի փոխարեն՝ 11 տեղամասում։ Ընդ որում, հիմնավոր կասկածներ ունենք, որ նույն զինվորները քվեարկել են մի քանի տեղամասերում»,- ասաց Վահե Հակոբյանը։

Նրա խոսքով՝ այս տվյալները ստացվել են շրջիկ խմբերի աշխատանքի արդյունքում, որոնք հավաքագրել են ընտրությունների արդյունքները։

ՀՀ երկրորդ նախագահ Ռոբերտ Քոչարյանն էլ ընդգծեց, որ սոցցանցերում հայտնվեցին բազմաթիվ տեսանյութեր, թե ինչպես են զինվորները մասնակցում ընտրության։

«Մենք տվյալներ ունենք, որ զինվորները դուրս չէին գալիս տեղամասից՝ մինչև ցույց չէին տալիս, թե ում են ընտրել։ Իսկ Սյունիքում զինվորների ընտրությունն էականորեն փոխում է ընտրությունների պատկերը։ Բայց հիմնական խնդիրն այն էր, որ գյուղերում չենք հասցրել աշխատել, իսկ դուք գիտեք, որ գյուղերում հանրայինի (նկատի ունի հեռուստաընկերությունը) ազդեցության տակ են»,-ասաց Ռոբերտ Քոչարյանը։

Վահե Հակոբյանը հիշեցրեց նաև, որ ընտրության օրը իրենց 5 շտաբերի պետերին բերման են ենթարկել։

Մանրամասները՝ տեսանյութում