Պատգամավորներից մեկն ինձ ասում էր՝ մի ասա ճշմարտությունը Ծառուկյանին. Զոհրաբյանը խոսել է ԲՀԿ-ի ներքին ինտրիգներից (տեսանյութ)

Ես մնում եմ շնորհակալ Գագիկ Ծառուկյանին, որ ինքն ինձ բերեց քաղաքական ասպարեզ և հնարավորություն տվեց կայանալ՝ որպես քաղաքական գործիչ: Այո եղել են խմբակցությունում մարդիկ, ովքեր հստակ աշխատել են իմ և Գևորգ Պետրոսյանի դեմ: Այս մասին այսօր «Հայելի» ակումբում կայացած մամուլի ասուլիսի ժամանակ ասաց ԱԺ անկախ պատգամավոր Նաիրա Զոհրաբյանը:

«Նրանք Ֆեյսբուքում գրում էին կեղտոտ նյութեր ու տանում էին պարոն Ծառուկյանին էին ներկայացնում՝ որպես հասարակության կարծիք Նաիրա Զոհրաբյանի և Գևորգ Պետրոսյանի մասին»,- ասաց Զոհրաբյանը:

Պատգամավորը նշեց, որ իր համար կանխատեսելի չէր, որ «Բարգավաճ Հայաստանը» չի անցնի խորհրդարան, սակայն ինքը գիտեր, որ կուսակցությունը հավաքելու է նվազագույն տոկոսներ՝ 6,5%, առավելագույնը՝ 7 տոկոս:

«Երբ Գագիկ Ծառուկյանը սոցիոլոգիական հարցումներ էր պատվիրում, ես գիտեմ՝ երիտասարդներից ովքեր էին այդ հարցումներն անում, ու ներկայացնում մինչև 27 տոկոս արդյունք: Ես գիտեմ նաև պատգամավորության թեկնածուներ՝ առաջին տասնյակում, որ գնում էին մարզեր և տեսնում էին պրոբլեմը ու երբ նրանց ասում էին՝ գնացեք, Ծառուկյանին ասեք, նրանք ասում էին՝ մեզ պե՞տք ա, միևնույն է մենք առաջին հնգյակում ենք, վեցնյակում ենք, իրենց մնացածը չէր հետաքրքրում, իրենց պետք էր ունենալ մանդատ: Ես հիմա ասում եմ բաց, և ես իրավասու չեմ խորհուրդ տալու Գագիկ Ծառուկյանին, բայց ճանաչում եմ նրան և այն մարդկանց, ովքեր իրեն մատուցում էին միայն կոմֆորտ սուտ: Նրանցից մեկն ինձ անընդհատ ասում էր՝ մի ասա ճշմարտությունը, ասա այն ինչ-որ ուզում է լսել»,- ասաց Զոհրաբյանը:

Պատգամավորն էկրաններից դիմեց ԲՀԿ նախագահ Գագիկ Ծառուկյանին և հիշեցրեց իրենց վերջին հանդիպումից դրվագ.

«Իմ շատ հարգելի պարոն Ծառուկյան, հիշո՞ւմ եք՝ մեր վերջին հանդիպման ժամանակ ասացի, որ ձեզ չեմ խաբելու, ես ձեզ չեմ ստելու, ես ձեզ չեմ ասելու, կոմֆորտ սուտ, ես Ձեզ ասելու եմ ճշմարտությունը: Ցավոք սրտի, Ձեր կողքին եղած մարդիկ նախընտրեցին կոմֆորտ, շաքարակալած սուտը: Ցավոք, «Բարգավաճ Հայաստանը» մնաց անպաշտպան մերկ իրականության հետ:

Նա ընդգծեց, որ ամբողջ խնդիրն այն է, որ ոմանք Ծառուկյանին ոչ միայն չեն ներկայացրել խնդիրները, այլև խոստացել են մի քանի հազար ձայներ բերել, և ամենաքիչ ձայներն են ապահովել: