Այն բանից հետո, երբ Շաքարյանը Հադրութում արդյունավետ ծառայություն էր իրականացնում, հանկարծ որոշեցին, որ նրան պետք է տեղափոխեն, ինչից օրեր անց, տարօրինակ պայմաններում, սպանվեց. Հոխիկյան

Հուլիսի 14-ին կայացած մամուլի ասուլիսի ժամանակ լրագրող, մեդիափորձագետ Նաիրի Հոխիկյանն անդրադարձավ Զինված ուժերի նկատմամբ վարվող քաղաքականությանը՝ նշելով, որ գլխատման գործընթաց է եղել։ 

«Ես բազմիցս բարձրաձայնել եմ, որ մեր բանակի գլխատման, ողնաշարի կոտրման գործընթացը սկսվել է 2019 թվականից։ Երբ, օրինակ, Արցախի հարավային թևի զինվորական հրամանատարությանն արդյունավետ ծառայություն իրականացրած սպայական կազմին հերթով տեղափոխեցին, տարան շատ ավելի ոչ կարևոր ծառայության, իսկ այդ թևում, որը թշնամու հսկողության տակ անցավ, նշանակեցին և կոչումներ, պաշտոններ տվեցին մարդկանց, որոնք ծառայության ընթացքում աչքի են ընկել վատ վարքով»,- նշեց Հոխիկյանը և հավելեց,- «Դա, իհարկե, բանակի ողնաշարը կոտրելու աստիճանական քայլ էր։ Հետո՝ պատերազմի ժամանակ, մենք տեսանք, որ պատերազմում իրենց արդյունավետ ներկայացրած հրամանատարությունը մնաց բունկերներում․ նրանց տարբեր պատճառաբանություններով թույլ չտվեցին մասնակցել պատերազմական գործողություններին»։

Մեդիափորձագետի խոսքով՝ գործընթացը շարունակվել է, ինչն առավել ակնառու է եղել, երբ նկարել է «Շուշիի անկման ճանապարհը» վավերագական ֆիմը։

«Երբ նկարում էի «Շուշիի անկման ճանապարհը» վավերագական ֆիմը, ես շատ-շատ փաստերի ականատես եղա, որից կարելի է պարզապես ճերմակել։ Մասնավորապես, երբ ականատես ես լինում, որ իրական ծառայություն իրականացնող մարդիկ, որոնք ադրբեջանցիների ահ ու սարսափն են դարձյալ, տարբեր պատճառաբանություններով հեռացնում են։ Վառ օրինակը՝ գնդապետ Սերգեյ Շաքարյանինն է։ Այն բանից հետո, երբ վերջինս Հադրութում արդյունավետ ծառայություն էր իրականացնում՝100-ից ավել ադրբեջանական տանկ և մոտ 2000 ադրբեջանցի զինվոր էր ոչնչացրել իր գումարտակով, հանկարծ որոշեցին, որ նրան պետք է տեղափոխեն այլ տեղ։ Տեղափոխելուց օրեր անց, տարօրինակ, անհասկանալի պայմաններում սպանվեց»,- նշեց Հոխիկյանը և հավելեց, որ դրանից հետո անգամ գործընթացը կանգ չառավ, այլ՝  շարունակվեց։