Ե՞րբ Խաչատուրովի նկատմամբ բռնաճնշումներ սկսվեցին և ինչո՞ւ էին Տավուշում ռուս զինվորականներ շրջում․ պարզաբանում է Հոխիկյանը

Մեդիափորձագետ, լրագրող Նաիրի Հոխիկյանն այսօրվա ասուլիսի ժամանակ անդրադարձավ Գրիգորի Խաչատուրովի՝ 3-րդ բանակային կորպուսի հրամանատարի պաշտոնից ազատելուն։

«Մեկ փակագիծ բացեմ․ 2021թ․-ի մարտի 8-ին, երբ խոսակցություն էր գնում այն մասին, որ Տավուշի՝ այսպես կոչված անկլավները պետք է հանձնվեն Ադրբեջանին, ասում էին, որ ռուս խաղաղապահներ են տեղափոխվել այնտեղ, որոնք իբրև պետք է ապահովեն այդ տարածքների հանձնումն Ադրբեջանին: Ես անձամբ մեկնեցի Տավուշի մարզ՝ այդ բնակավայրեր։ Ես պարզեցի, որ այն ժամանակվա Գլխավոր շտաբի պետ Օնիկ Գասպարյանի հրամանով և Գրիգորի Խաչատուրովի, նրա անմիջական աշխատանքի շնորհիվ այնտեղ կազմակերպվել էր պատշաճ պաշտպանություն, պաշտպանողականությունը բարձրացվել էր, թեպետ ռազմական գործողություններ չէր եղել։ Ինչպես նաև, վերջիններս իրենց անձնական նախաձեռնությամբ դիմել էին ռուսական կողմին, որ այստեղ պետք է ռուսական զորք տեղակայվի, քանի որ այդտեղ ադրբեջանական և թուրքական զորքերը շատ մոտեցել էին Տավուշի սահմաններին»,-նշեց Նաիրի Հոխիկյանը և հիշեցրեց մի դեպք, երբ Տավուշի մարզում ռուս զինվորներ են նկատվել։ Այդպիսով՝ Խաչատուրովն ու Գասպարյանը փորձել են կանխել ադրբեջանա-թուրքական զորքերի հարձակումը Տավուշի ուղղությամբ։ 

Հոխիկյանի խոսքով՝ Խաչատուրովը կարողացել էր արդյունավետ կազմակերպել այդ հատվածների պաշտպանությունը։ Սակայն, հետո ականատես եղանք Խաչատուրովի նկատմամբ ճնշումներիև բռնաճնշումների, տարբեր մեղադրանքներ հնչեցին նրա հասցեին։ 

Մեդիափորձագետը նաև հիշեցրեց ԱԺ իմքայլական պատգամավոր Վահե Ղալումյանի հայտարարությունն այն մասին, որ իբրև դրանք ադրբեջանական անկլավներ են։ 

«Այո՛, խորհրդային տարիներին այդ հատվածները նվիրվել են Ադրբեջանին, բայց մենք չմոռանանք, թե ինչու է Ադրբեջանը հասել նրան, որ այդ տարածքները հանձնվեն իրեն։ Որովհետև, կրկնում եմ՝ ինչպես՝ Էյվազլիի հատվածում Խորհրդային տարիներին այդ միջպետական ճանապարհը հանձնվել էր Ադրբեջանին, և այդկերպ Ադրբեջանը, փաստացի, այսօր ևս հսկողություն ունի Հայաստան-Իրան միջպետական ճանապարհի վրա, ապա, երբ ցանկանա՝ կարող է կտրել Իրանի հետ հաղորդակցությունից։ Նույն կերպ հիմա՝ Ադրբեջանի նպատակն է իր հսկողության տակ վերցնել Հայաստանի և Վրաստանի ցամաքային հաղորդակցությունը։ Եթե այսքան բան չի հասկանում ՀՀ այսօրվա կառավարությունը, ապա կամ հիմար է, կամ՝ դավաճան»,-ասաց Հոխիկյանը։