Այս ընտրությունների արդյունքները չեն արտահայտում ՀՀ ժողովրդի իրական կամքը․ Արամ Վարդևանյանի եզրափակիչ ելույթը՝ ՍԴ-ում

Բարձր դատարան, վերջին երեք տարիների ընթացքում մենք տեսել ենք այն իրավական և իրական հետևանքները, երբ մեկ ուժ ունենում է Ազգային ժողովում մանդատների 3/5-ից ավելին կամ առնվազն 3/5-ը։ Դրա հետևանքները բոլորս գիտենք։ Այսօր Սահմանադրական դատարում եզրափակիչ ելույթի ժամանակ ասաց «Հայաստան» դաշինքի ներկայացուցիչ Արամ Վարդևանյանը:

«Ես վստահաբար ասում եմ՝ այսպիսի հետևանքներ Հայաստանի պատմության մեջ այլևս երբեք չեն լինելու: Եվ կարող եմ ասել, որ այդ իմ պնդման երաշխավորներից մեկը հենց պետք է և կարող է լինել բացառապես Սահմանադրական դատարանը: Միապետությունը, միակուսակցական կառավարումը չի փակում Հայաստանի պետականության դռները, այլ այն իրականություն է: Վերջին երեք տարիները Հայաստանի Հանրապետությունում մեկ ուժի կամքի, պարտադրանքի, թելադրանքի, ռեսուրսի և որոշումների կայացման տարիներն են եղել․ բացառապես մեկ ուժի։ ՀՀ սահմանադրությունը միապետություն ստեղծելու մասին չէ։ Այն երբեք չի եղել դրա մասին։ Մեր անկախության հռչակագիրը չի եղել միապետության և մեկ ուժի կողմից ՀՀ բոլոր որոշումների ընդունման մասին։ Սահմանադրության 4-րդ հոդվածը զսպումների և հակակշիռների մասին երաշխիքները, ժողովրդավարության սկզբունքը թե՛ վերջին 3 տարիների ընթացքում, թե՛ հիմա ոչ թե վտանգված են, այլ փաստացի տապալված»,- նշեց Վարդևանյանը և հավելեց, որ այս իրավիճակը կարող է վերականգնել Բարձր դատարանը։ 

Վարդևանյանի խոսքով՝ այս ընտրությունների արդյունքները չեն արտահայտում ՀՀ ժողովրդի իրական կամքը։ Պատկերը, որը մենք տեսնում ենք Կենտրոնական ընտրական հանձնաժողովի որոշմամբ՝ խեղաթյուրված է։