Ասում են՝ 50 հազարով հնարավոր չէ այս կամ այն ծախսն անել, իսկ թոշակառուին հնարավո՞ր է ապրել 30 հազար դրամով. Աննա Գրիգորյանը՝ պատգամավորների օրապահիկը հնգապատկելու մասին

Երեկ դուք բոլորդ տեսաք՝ ինչպես են ոստիկանները և ԱԱԾ աշխատակիցները զինված, դիմակներով ներխուժում Զանգեզուրի պղնձամոլիբդենային կոմբինատ: Ինձ մոտ այնպիսի տպավորություն էր, որ նրանք պետք է գնային Սև լիճ, որովհետև այնտեղ են մեր թշնամիները, բայց ճանապարհը խառնել և պատահմամբ հայտնվել են այնտեղ: Այս մասին այսօր լրագրողների հետ ճեպազրույցում ասաց ԱԺ անկախ պատգամավոր Աննա Գրիգորյանը: 

«Մարդկանց պարզապես տեռորի են ենթարկում և ինչ-որ ցուցմունքներ են կորզում, որն, իհարկե, անհասկանալի է, մարդիկ այս պահին ահուսարսափով են այնտեղ գտնվում: Պետության կողմից նման քայլը կարելի է որակել հակապետական, որովհետև նման քայլից հետո ո՞ր մի տնտեսվարողը, որ մի արտաքին ներդրողը կցանկանա ներդրումներ կատարել Հայաստանում: Սա պետք է դիտարկել նաև քաղաքական երանգների ներքո»,- ասաց պատգամավորը: 

Ըստ Գրիգորյանի՝ ԱԺ արտահերթ նիստ բերված նախագծերից մեկով առաջարկվում է հանքարդյունաբերողներից գումարը վերցնել տալ ժողովրդին, բայց մեկ այլ նախագծով այդ գումարը տալիս են ոչ թե ժողովրդին, այլ պատգամավորներին՝ բարձրացնելով նրանց տրվող հավելավճարը: 

«Այսօր օրակարգում մի քանի հարցեր կան, որոնցից մեկն արդյունաբերությանն էր վերաբերում է: Եվ ստացվում է ի՞նչ: Ասում են՝ գի՞տեք ինչ, ժողովուրդ ջան, եկեք փողը վերցնենք հանքարդյունաբերողներից և տանք ժողովրդին, բայց ժողովրդին տալու փոխարեն նախագիծ են բերում, որով պատգամավորների օրապահիկը 50 հազարից դարձնում է 250 հազար: Այսինքն՝ այդ գումարը, որ վերցնում եք, ժողովրդի՞ն է անհրաժեշտ, թե՞ պատգամավորներին: Ասում են՝ 50 հազարով հնարավոր չէ այս կամ այն ծախսն անել, իսկ թոշակառուին հնարավո՞ր է ապրել 30 հազար դրամով, ուսուցիչները կարողանո՞ւմ են իրենց ծախսն ապահովել այն աշխատավարձով, որը դուք հիմա իրենց տալիս եք: Իհարկե, չեն կարողանում: Այսինքն՝ այն պարագայում, երբ մենք ունենք սահմանային չկահավորված սահմաններ, բամաթիվ չլուծված խնդիրներ, այս ֆոնին ի՞նչ  է նշանակում մտածել, որ կարելի է ևս 200 հազար դրամով ավելացնել պատգամավորների ծախսերը»,- ասաց Գրիգորյանը:

Նա նշեց, որ արդյունաբերությանը վերաբերող նախագծում քաղաքական շարժառիթ տեսնում է, քանի որ այս ամենը տեղի է ունենում հիմա, իսկ ընտրությունների ընթացքում չեն թաքցրել, որ նման ենթատեքեսետերով են առաջ շարժվելու: