Լապշինի, Փաշինյանի, Կարապետյանի խոսակցությունների հիման վրա պիտի գործ հարուցվի. Վարդանյան

Ընտրություններից հետո երկրում ճգնաժամը չի լուծվել, այլ հակառակը՝ շատ ավելի սաստկացել է։ Երկրում մթնոլորտը պարզապես սարսափելի է,անընդհատ կալանքներ, քրեական հետապնդումներ և այլն։ Այս մասին քիչ առաջ «ՀՀ քաղաքական և իրավական մարտահրավերները» խորագրով հրավիրած քննարկման ժամանակ իր ելույթում ասաց Էլինար Վարդանյանը։

«Միջազգային հարաբերություններում գրեթե ոչինչ չի կատարվում,բացի վարչապետի մոսկովյան այցից, որից հիշվում են միայն ՌԴ նախագահի հայտարարություններն այն մասին,թե սպասվում են բարդ,ցավոտ,զգայուն լուծումներ։ Սահմաններին իրավիճակը խիստ անհանգիստ է, երկու օր առաջ ունեցանք զոհ, վիրավոր, ունենք անհետ կորածներ։ Ալիևը իր հերթին Սևանը, Զանգեզուրը ու Երևանը հայտարարում է ադրբեջանական տարածքներ ու խոստանում, որ իրենք անպայման գալու են։ Այս մասով իշխանությունների վախվորած արձագանքը ավելի լավ էր չլիներ, որովհետև այն ավելի շատ նման էր չարձագանքելուն։ Երկրում չկա որեւէ օրակարգ, կա հսկայական գնաճ, ծայրահեղ ծանր վիճակ է գյուղատնտեսությունում և այլն։ Երեկ էլ հետաքրքիր բացահայտումներ եղան Փաշինյանի, Լապշինի ու Ուկրաինայում Հայաստանի դեսպան Վլադիմիր Կարապետյանի մասնակցությամբ։ Ես չեմ ուզում դատավորի դեր ստանձնել ու գնահատականներ տալ, բայց ես կարծում եմ,որ սա անպայման պիտի լինի իրավապահների ուշադրության կենտրոնում։ Այդ հայտարարությունների հիման վրա արդեն իսկ այսօր ՀՔԾ-ն, ԱԱԾ-ն պիտի քրեական գործ հարուցեն։ Ազգային ժողովի առաջիկա նիստերին նաեւ պիտի անդրադարձ կատարվի այն բոլոր բացահայտումներին, որոնք երեկ արվեցին։ 2018 թվականին Վլադիմիր Կարապետյանը կոչ էր անում դատախազությանը վիքիլիքսյան տվյալների հիման վրա գործ հարուցել Արմեն Գևորգյանի նկատմամբ։ Եթե Վլադիմիր Կարապետյանը պահանջում էր այդ տվյալների հիման վրա գործ հարուցել, ապա երեկվա հայտարարություններից հետ, կրկնում եմ, սա չի կարող չլինել իրավապահների ուշադրության կենտրոնում»,- ասաց Վարդանյանը։