Գորիսի քաղաքապետի դեմ ցուցմունք է տվել Քարահունջի կալանավորված ղեկավարը. փաստաբան

Ինչպես կանխազգում էի, դատարանը բավարարեց ՀՔԾ միջնորդությունը, և Առուշ Առուշանյանին երկու ամսով կալանավորման որոշում կայացրեց: Այս մասին այսօր՝ դատարանի բակում լրագրողների հետ զրույցում ասաց Գորիսի համայնքապետ Առուշ Առուշանյանի փաստաբան Արմեն Մելքոնյանը։

«Սա է մեր իրականությունը, կշարունակենք պայքարել, որպեսզի հասնենք ճշմարտության և արդարության: Սա նախադեպը չունեցող բան է, երբ մեկ անձի հակասական ցուցմունքով կարող են մի ամբողջ համայնքի գլխատել: Մեկ անձ սկզբից հերքել է, հետո օրեր անց, չգիտես ինչու, ինչ-որ ցուցմունք է տվել և այդ մեկ հակասական ցուցմունքով անձին կարող են կալանավորել: Ես կարող եմ փաստել, որ ՀՀ-ում ազատությունը որևէ արժեք չունի: Ասում են՝ ժողովրդի մանդատ, բա Առուշանյանը չունե՞ր ժողովրդի մանդատ, թե՞ էս պահին կարելի է թքել այդ մանդատի վրա»,- ասաց փաստաբանը: 

Հարցին, թե ձերբակալված կամ կալանավորված անձի՞ ցուցմունքի հիման վրա են նրան կալանավորել, փաստաբանը դրական պատասխան տվեց. «Այո, կալանավորված անձ, տարեց կին, Քարահունջի ղեկավարի մասին է խոսքը, որը սկզբից ամբողջովին հերքել է, հետագայում՝ օրեր անց, 3 անգամ հարցաքննվել է, մի ցուցմունքում ասել է, որ Առուշանյանն ասել է, որ «Հայաստան» դաշինքի օգտին քվեարկեն: Բայց այստեղ դատարանի խնդիրն է: Մի բան չի եղել քննիչի միջնորդության մեջ գրվածից, որ մենք թողնենք քարը քարի վրա, դատարանը գլխով համաձայնության նշաններ էր տալիս, էս ի՞նչ թատրոն ա էլի, միանգամից կցեք ՀՔԾ-ին, պրծնենք էլի, էլ ինչի՞ ենք գալիս ստեղ, էսքան խոսում, գրում-ջնջում»:

Հիշեցնենք, որ Գորիսի համայնքապետին մեղադրանք է առաջադրվել ՀՀ ՔՕ 35-154.2-րդ հոդվածի 4-րդ մասի 2-րդ կետով, 38-149-րդ հոդվածի 2-րդ մասի 4-րդ կետով եւ 38-154.2-րդ հոդվածի 3-րդ մասով: Հատուկ քննչական ծառայությունը նախօրեին միջնորդություն էր ներկայացրել Երեւանի ընդհանուր իրավասության դատարան` Առուշանյանի նկատմամբ կալանավորումը որպես խափանման միջոց ընտրելու համար:

Ըստ ՀՔԾ հաղորդագրության՝ Սյունիքի մարզի Գորիս համայնքի ղեկավար, «Հայաստան» դաշինքի ընտրական ցուցակի 32-րդ համարը զբաղեցնող Ա.Ա.-ն, հիշյալ դաշինքի օգտին առավելագույն քվեներ ապահովելու եւ ընտրություններում ցանկալի արդյունք արձանագրելու անձնական եւ խմբային շահերից ելնելով` նախապատրաստել է ծանր հանցագործություն, այն է` երկու եւ ավելի ընտրողի կաշառք տալը: