ՍԴ-ն Հայաստանում խափանեց ժողովրդավարության պաշտպանությունը․ Սոս Հակոբյան

Սահմանադրական դատարանը ոչ թե մերժեց ընդդիմության դիմումն ու խափանեց նրա սպասումները, այլ ընդհանրապես Հայաստանում խափանեց ժողովրդավարության պաշտպանությունը: Այս մասին հայտարարեց «Պատիվ ունեմ» դաշինքի անդամ Սոս Հակոբյանը՝ լրագրողենրի հետ հանդիպման ժամանակ: 

Ըստ նրա, եթե անգամ ՍԴ-ն բավարարեր ընտրությունների արդյունքներով ընդունված որոշումը անվավեր ճանաչելու վերաբերյալ պահանջը` Սդ-ն դրանով չէր լուծի քաղաքական ուժերի հարաբերակցության փոփոխության հարց, քանի որ դրանից երկուսի դեպքում կլինեին նոր ընտրություններ, կամ երկրորդ փուլի անցկացում, իսկ մեկ դեպքում էլ, եթե, օրինակ, ԸՕ որոշակի դրույթներ հակասահմանադրական ճանաչվեին, ապա, հնարավոր է, իրականացվեր մանդատների բաշխում․

«Անգամ մանդատների վերաբաշխման տարբերակը եթե դիտարկենք, հավանաբար, կլիներ այնպես, որ ընդդիմությունն ունենար ավելի ուժեղ լծակներ, բայց ընդդիմությունը ՍԴ-ի «հույսին չէր»՝ իր քաղաքական հարցերը լուծելու համար։ Ընդդիմությունը, անկախ ՍԴ որոշումից, գծում է իր գործունեության նոր պլաններ, բայց ՍԴ-ն կարող էր սահմանել՝ ՀՀ-ում ընտրությունների ժամանակ ինչ է կարելի, ինչ՝ ոչ»,-ասաց նա։

Սոս Հակոբյանը նկատում է, որ ՍԴ-ն չպետք է մի քանի խախտումներ վերցներ ու իր որոշումը կայացներ միայն դրանց հիման վրա:

«Սպասում էինք, որ ՍԴ-ն, ազատ ընտրությունների անցկացման սկզբունքից ելնելով, կասեր, որ ՀՀ-ում չի կարելի սպառնալիքներով, թաթիկներ-ոտիկներ կտրելով հայհոյախառն խոսքով լցված ընտրություններ անցկացնել»,-ասաց նա։

Հակոբյանի խոսքով, ընդդիմության առաջին անելիքներից է հանրության ճնշման շնորհիվ ու իր բոլոր լծակներով կանգնեցնել այս պատուհաս իշխանությանը՝ թույլ չտալով պետականակործան հերթական քայլը կատարել:

Ըստ Հակոբյանի՝ քարոզարշավի ընթացքում, գուցե ժամանակի սղության պատճառով, ընդդիմությունը չկարողացավ շատ շփվել մարդկանց հետ, ներկայացնել, թե ինչ է ուզում, և պետք է աշխատի այդ ուղղությամբ։

««Պատիվ ունեմ» դաշինքը լինելու է ռադիկալ ընդդիմություն՝ քաղաքական իմաստով, բովանդակային առաջարկներով, քննադատություններով և օրակարգով է աշխատելու։ Ցանկացած եղանակով, նաև՝ կոշտ բառապաշարով, փողոցային պայքարով, հավանաբար՝ նաև խորհրդարանական լծակներն օգտագործելով՝ «Պատիվ ունեմ» դաշինքը իր տեղը ցույց է տալու այս իշխանությանը և լինելու է մաքսիմալ արդյունավետ։ Իշխանության հետ համագործակցություն չի կարող լինել»,-ասաց նա։