Թեկուզ ՆԱՏՕ-ի բանակը բերեն այստեղ՝ մեզ լռեցնելու նպատակով, իրենց չի հաջողվելու, այս խորհրդարանը շատ կարճ կյանք ունի. Ղազինյան

Այսօր պարզ դարձավ, որ իշխանությունն ունի մեկ նպատակ՝ ընդդիմությանը ենթարկեցնել: Այս մասին այսօր Ազգային ժողովում լրագրողների հետ զրույցում ասաց «Հայաստան» դաշինքի անդամ Արթուր Ղազինյանը: 

«Ես ուզում եմ հավաստիացնել մեր քաղաքացիներին և հատկապես նրանց, ովքեր մեզ ձայն են տվել և գործուղել խորհրդարան, որ մեզ վախեցնել չի հաջողվելու: Մենք ունենք պայքար և այդ պայքարը հանուն պետության է: Թեկուզ ՆԱՏՕ-ի բանակը բերեն այստեղ՝ մեզ լռեցնելու նպատակով, իրենց չի հաջողվելու, մենք շարունակելու ենք պայքարը»,- ասաց Ղազինյանը: 

Նա չցանկացավ խոսել տեղի ունեցած միջադեպի մասին՝ նշելով, որ դա հարիր չէ իր անձին և այս Ազգային ժողովին: 

«Ամեն դեպքում հարձակում տեղի ունեցավ ինձ վրա, ընդ որում՝ մի քանի հոգով: Մեկ բան ակնհայտ է, որ վերջին միջադեպը լավ կազմակերպված, լավ պլանավորված, թույլատրված և հրահանգավորված ակցիա էր երկրի բարձրագույն իշխանության կողմից, որին դուր չեն եկել մեր որակումները, մեր ելույթները, մեր գնահատականները, հրահանգ է տրված եղել պատժել մեզ»,- ասաց պատգամավորը: 

Ըստ նրա՝ այս խորհրդարանն այլևս սնանկ է և անգործունակ, իշխանությունը ցանկացած դեպքում պատասխանատու է ցանկացած իրավիճակի և ելքի համար:

«Այսօրվա վիճակի համար պատասխանատու է երկրի բարձրագույն իշխանությունը: Այս խորհրդարանը շատ կարճ կյանք ունի, որովհետև Սահմանադրությամբ և օրենքներով ր վրա դրված առաքելությունն ի զորու չէ կատարելու»,- նշեց Ղազինյանը: