Փաշինյանի հայտարարությունը նշանակում է, որ սարսափելի իրադարձություններ են սպասվում Հայաստանին․ Արեգնազ Մանուկյան

Ազգային ժողովի «Հայաստան դաշինքի» պատգամավոր Արեգնազ Մանուկյանն անդրադարձել է կառավարության այսօրվա՝ օգոստոսի 27-ին նիստի ժամանակ Նիկոլ Փաշինյանի հայտարարությանը։

Փաշինյանը նշել է, թե որոշակի դրական հրապարակային ազդակներ կան Թուրքիայի կողմից. «Մենք այդ ազդակները կգնահատենք և դրական ազդակներին դրական ազդակով կպատասխանենք»,-ասել է նա։

Պատգամավորի դիտարկմամբ, Փաշինյանի հայտարարությունը չարագույժ է։

«Գորիս-Կապան ռազմավարական ճանապարհահատվածը շարունակում է փակ մնալ։ Շրջափակման մեջ են հայտնվել այդ հատվածի հայկական գյուղերը։

Շատ խորհրդանշական է, որ այս ամենը տեղի է ունենում «Խաղաղության դարաշրջանի» մասին ճամարտակումների ֆոնին։

Դատելով տեղեկատվական հոսքերից՝ այս ամենը դեռ ծաղիկներն են։ Բանն այն է, որ Նիկոլ Փաշինյանն այսօր հայտարարեց, որ Թուրքիայից դրական ազդակներ է ստացել ու դրանք գնահատելուց հետո դրականով կպատասխանի։

Փաստորեն Ադրբեջանն ու Թուրքիան մտրակի ու բլիթի քաղաքականություն են վարում Հայաստանի նկատմամբ։ Ադրբեջանը ճանապարհ է փակում (ի դեպ, նիկոլենք էլ ճանապարհ փակելով Հայաստանը գրավեցին), Թուրքիան՝ դրական ազդակ հղում։

Այս ամենը նշանակում է, որ սարսափելի իրադարձություններ են սպասվում Հայաստանի համար, քանզի 2020-ի սեպտեմբերի 27-ից առաջ էլ նույն Նիկոլ Փաշինյանը խոսում էր Ադրբեջանից եկող դրական ազդակների մասին, կառուցողական որակում Իլհամ Ալիևի վարքագիծն ու խոսում Ադրբեջանի ժողովրդին բավարարելու իր պատրաստակամության մասին․․․»։