Բնապահպանության նախարարությունը չստուգված ձո՞ւկ է բաց թողել Սևանա լիճ

«Սևանա լիճ բաց թողնվող ձկնատեսակները ոչ թե գեղարքունի են, այլ` կարմրախայտ, գեղարքունու հիբրիդներ, կամ անհայտ ծագման այլ սաղմոններ, քանի որ ձկնային տնտեսությունները չեն կարողանում անհրաժեշտ քանակ ապահովել, ապա Սևանա լիճ է ուղարկվում ոչ միայն անհրաժեշտ ձկնատեսակներ»,- այս մասին օրերես հայտարարեց կենսաբանական գիտությունների դոկտոր Սամվել Պիպոյանը:

Նշենք, որ արդեն 10 տարի է գեղարքունի և ամառային իշխանի մանրաձուկ է բաց թողնվում Սևան լճի` ձկնաբազմազանությունը համալրելու համար. բնապահպանության նախարարությունը ամեն տարի այդ նպատակով ծախսում է մոտ 60 մլն դրամ, մրցույթ է հայտարարում:
Newspress.am-ին ՀՀ ԳԱԱ Կենդանաբանության և հիդրոէկոլոգիայի գիտական կենտրոնի տնօրեն Բարդուխ Գաբրիելյանը խնդրի վերաբերյալ նշեց, որ ինքը ևս այդ հարցը բարձրացրել է և իրոք այստեղ խնդիր կա, և պետք է ստուգվի բնապահպանության նախարարության կողմից գտնվող մանրաձուկը և հստակ իմանալ, թե ինչ տեսակներ են լցվում Սևանա լիճ:

Բ. Գաբրիելյանը միաժամանակ հիշեցրեց, որ 2016թ-ից այլևս նման գնում չի կատարվի, ստեղծվում է Իշխան ՓԲԸ-ն, որտեղ աճեցվելու են գեղարքունի և ամառային իշխան, որոնցով կհամալրվեն լճի պաշարները. կթույլատրվի միայն այս ընկերության աճեցված մանրաձկան լցնումը լիճ:
Նա նաև գտնում է, որ գնման պայմանագրի մեջ պետք է կետ լիներ, որ միայն անհրաժեշտ տեսակները պետք է վաճառվեն, ստուգում պետք է իրականացվեր և չի բացառվում, որ հիբրիդներ կամ այլ տեսակի մանրաձկներ են լցվել Սևան:

Բարդուխ Գաբրիելյանը միաժամանակ հաղորդեց, որ այժմ Սևանա լճում կան այնպիսի ձկնատեակներ, որոնք նախկինում չեն հանդիպել. օրինակ արարատյան տառեխիկը, ժամանակին կարասը. «Նման փոփոխությունները չեն կարող չազդել լճի էկոհամակարգի ամբողջական շղթայի վրա»: