Մենք պահաջում ենք, որ հերքումը ներկայացվի նույն ամբիոնից, ինչ ամբիոնից, որ հնչեցվել է, այսինքն՝ ԱԺ-ից. փաստաբանը՝ Սարգսյանն՝ ընդդեմ Սուքիասյանի» հայցի մասին

Րոպեներ անց ես հայցադիմումը կմուտքագրեմ ընդհանուր իրավասության դատարան՝ ընդդեմ ԱԺ պատգամավոր Խաչատուր Սուքիասյանի՝ ՀՀ երրորդ նախագահ Սերժ Սարգսյանի պատիվն ու բարի համբավն արատավորող տեղեկությունները հերքելու պահանջով: Մենք պահաջում ենք, որ հերքումը ներկայացվի այն նույն ամբիոնից, ինչ ամբիոնից, որ հնչեցվել, այսինքն՝ ԱԺ ամբիոնից: Այս մասին այսօր Երևանի ընդհանուր իրավասության դատարանի Կենտրոն նստավայրի դիմաց լրագրողների հետ զրույցում ասաց ՀՀ երրորդ նախագահ Սերժ Սարգսյանի փաստաբան Ամրամ Մակինյանը: 

«Հայցադիմումը բավականին ծավալուն է: Մենք ներկայացրել ենք բոլոր հիմնավորումները, որոնց ուժով, մենք համոզված ենք, որ դատարանը մեր հայցը բավարարելու է և պարտավորեցնելու է Խաչատուր Սուքիասյանին տեղեկությունները հերքել»,- ասաց փաստաբանը: 

Նրա խոսքով՝ որևէ մեկի համար գաղտնիք չէ, որ այս իշխանությունները, մինչ իշխանության գալը, գեներացրել են շատ մեծ քանակության սուտ:

«Այդ մեծ քանակության ստի արդյունքում կարողացել են հասարակությանը բաժանել սևերի և սպիտակների, գեներացրել են ահռելի քանակության ատելություն, որի արդյունքում ունենք այն, ինչ ունենք: Ես հրապարակային հայտարարում եմ, որ այսուհետ բոլոր ստերի հետևից մենք գնալու ենք, և այս իշխանություններն այլևս չեն ունենալու հնարավորություն օգտվել մեր համբերությունից, մեր բարի կամքից, համբերատարությունից, և հասարակության լայն զանգվածների շրջանում սուտ տեղեկություններ, հերյուրանքներ հրապարակելով՝ անվանարկել մարդկանց, որոնց գործունեության արդյունքում, որոնց աշխատանքի, ջանքի և դրած կյանքի արդյունքում մենք հիմա կանգնած ենք այստեղ: Մենք այլևս այդպիսի վարք չենք հանդուրժելու»,- ասաց Մակինյանը: